Koronavırýs indeti bastalǵaly Almatyda 39 myń PSR testi ótkizildi. Taǵy 19,5 myń ekspress-testiler qaýip aımaǵynda júrgen top ókilderinen alyndy. Bul týraly ákimdiktiń baspasóz ortalyǵynda qalanyń memlekettik bas sanıtarlyq dárigeri Jandarbek Bekshın málimdedi.

– Koronavırýsty anyqtaıtyn 40 myńǵa jýyq ekspress-test qalaǵa gýmanıtarlyq kómek aıasynda jetkizildi. Qazirgi kezde onyń 19,5 myńnan astamy tegin negizde júrgizilgen. Koronavırýs juqtyrdy degen 16 jaǵdaı PSR ádisimen anyqtaldy. "Olımp" klınıko-dıagnostıkalyq zerthanasy bes jedel testileý pýnktterin ashty. Olar – tegin, biraq tek belgili bir tulǵalar tobyna ǵana jasalady. Testileý elimizdiń Bas sanıtarlyq dárigeriniń bekitken Qaýlysynyń talaptaryna saı júrgiziledi. Birinshi kezekte bul ınfeksıa juqtyrý qaýpi joǵary aýmaqta jumys istep jatqan top ókilderi, mysaly blok-beketterde jumys isteıtin áskerı kontıngent. Bulardyń aldynan óte kóp azamattar ótedi. Iaǵnı, olar óte kóp tulǵalarmen qarym-qatynasta jumys istep jatyr. Laboratorıalyq ortalyqqa jappaı barý men kezekke turmas úshin olardyń jumys oryndarynda taldaýlar jınaý maqsatymen kóshpeli brıgadalar quryldy, – dedi J. Bekshın.

Qalanyń bas sanıtarlyq dárigeri Almatyda PSR ádisimen koronavırýsqa kúnine 2700 testke deıin alynatynyn aıtty.

Testileý josparly túrde, birinshi kezekte medısınalyq qyzmetkerler, áleýmettik-medısınalyq uıymdardyń qyzmetkerleri sıaqty juqtyrý qaýpi joǵary degen toptarda júrgiziledi.

Olardy testileý aıaqtalǵannan keıin saýda qyzmetkerlerin, kýrerlerdi jáne basqa da kásipterdiń ókilderin testileý bastalmaqshy. Óıtkeni, olar qyzmet babymen kóptegen adamdarmen baılanysýda.

Qazirgi ýaqytta Almatyda 20 myń PSR test bar, jaqyn arada taǵy 30 myń test jetkizilmekshi. PSR testtermen jabdyqtaý respýblıkalyq búdjet esebinen júrgiziledi.