Mańǵystaý oblysynyń jedel járdem qyzmeti jańa 3 avtokólikpen tolyqty. Jedel járdem qyzmetine berilgen zamanaýı kólikter GAZ avtomobılderi bazasynda qurastyrylǵan jáne V kategorıasyna sáıkes keledi. Jańa tehnologıalyq qural jabdyqpen qamtamasyz etilgen bul atvomobılderge suranys joǵary. Evro-5 ekologıalyq standartyna saı, barlyq qaýipsizdik júıelerimen qamtylǵan.

Mańǵystaý oblysy jedel jáne shuǵyl járdem stansıasyna tabystalǵan Sobol, Next ı Bıznes 4h4 tolyq jetekti Gazel avtomobılderi «SemAZ» JSHS bazasynda jınalǵan. «Vıraj»  kompanıalar toby quramyna kiredi jáne jedel medısınalyq kómek avtomobılderine qoıylatyn zamanaýı talaptarǵa saı keledi.

Temir tulparlar ázirge Aqtaý qalasyndaǵy shaqyrtýlarǵa barady, sebebi «103» qyzmetine túsetin negizgi shaqyrýlar oblys ortalyǵynda kóp bolyp tur.

Búgin «NCOC» kompanıasynyń ókilderi Aqtaýdaǵy «Vıraj» avtosalonynda 3 avtokóliktiń kiltin aq halatty abzal jandarǵa tabys etti. Bul máseleniń oń sheshilýine Mańǵystaý oblysy ákimdigi yqpal etken. Aldaǵy ýaqytta taǵy da jańa kólikter beriledi dep kútilýde. Ol úshin ınvestorlarmen kelissózder júrgiziledi jáne jergilikti búdjetten qosymsha qarajat qarastyrylmaq.

Mańǵystaý oblysy jedel jáne shuǵyl járdem stansıasy dırektorynyń mindetin atqarýshy Jáınagúl İlıasovanyń aıtýynsha, qazirgi ýaqytta oblys boıynsha táýlik boıy kezekshilikke 46 jedel járdem brıgadasy jumyldyrylǵan. 

«Covid-19» vırýsymen kúres kezinde jedel járdem qyzmeti aldyńǵy qatarda júredi. Al avtoparkti jańartý másele qashanda ózekti. 700.000-myńǵa jýyq turǵyny bar Mańǵystaý óńirinde negizinen 70 kólik bolýy tıis. Buıyrsa bul másele kóp kúttirmeı sheshimin tabady dep senemiz. Oblys ákimdigine jáne NCOC kompanıasyna alǵysymyz sheksiz», - deıdi ol.

Osylaısha NCOC kompanıasy óziniń óndiristik qyzmeti júzege asyrylyp jatqan óńirlerdegi jergilikti qoǵamdastyqqa COVID-19 indetimen kúresýge kómek kórsetýdi jalǵastyrýda.

Jaqyn arada NCOC Mańǵystaý oblysynyń medısınalyq mekemelerin asa qajet ómirlik mańyzy bar birneshe jabdyqtarmen, sonyń ishinde ókpeni jasandy jeldetetin zamanaýı qurylǵylarmen, kóp fýnksıaly kereýettermen, defıbrıllátorlarmen, sonymen qatar dezınfeksıalaý quraldarymen jáne medısınalyq personalǵa arnalǵan jeke qorǵaný quraldarymen qamtamasyz etpek.

NCOC kompanıasy ótken aptada Atyraý oblysynyń densaýlyq saqtaý júıesine qajetti medısınalyq jabdyqtar jetkizý jumysyn bastap ketti. NCOC jumys jasap kele jatqan kóp jyldar ishinde Atyraý jáne Mańǵystaý oblystaryndaǵy jergilikti jurtshylyqtyń ajyramas bóligi bola bildi jáne kompanıa úshin qolynan kelgenshe kómek kórsetý osyndaı kúrdeli kezeńde óte mańyzdy bolyp tabylady.

Aıta ketý kerek, oblys ákimdigi tarapynan densaýlyq saqtaý salasyna qomaqty qarajat bólinýde. Materıaldyq-tehnıkalyq bazany jańartýdan bólek, koronavırýspen kúres júrgizip jatqan aq halattylarǵa 13 teplovızor jáne 1000-ǵa tarta qorǵanysh kostúmderi men arnaıy halattar basqa demeýshilerdiń esebinen satyp alyndy.