QR sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti oblystyq prokýratýramen birlesip, MO Polısıa Departamentiniń laýazymdy tulǵalarynyń zańsyz áreketin áshkereledi. Aqtaý qalasynda karantın kezinde "jumys isteýdi" jalǵastyrǵan jezóksheler ordasynyń zańsyz áreketine polısıanyń "qamqorlyq" jasaǵanyn anyqtady.
Bul týraly Mańǵystaý oblysynyń Qoǵamdyq komýnıkasıalar ortalyǵynda ótken brıfıń barysynda QR sybaılas jemqorlyqqa qarsy is-qımyl agenttiginiń MO boıynsha departamentiniń Tergeý basqarmasynyń basshysy Baýyrjan Serikuly Baımyrza málimdedi.
Oblys aýmaǵynda karantın jarıalanǵanyna qaramastan polısıa qyzmetkerleri quqyqbuzýshylyq áreketterdi toqtatý sharasyn almaǵan.
Sybaılas jemqorlyqqa qarsy qyzmet tártip saqshylary koronavırýs ınfeksıasyn juqtyrǵan adamnyń jezókshelikpen aınalysatyn shetel azamatshalarymen baılanysta bolǵany týraly aqparatty jasyryp qalǵan dep tujyrymdady. Vedomsto polısıa osy týraly málimetti "qupıada ustady" dep málimdedi.
Sybaılas jemqorlyqqa qarsy qyzmettiń Tergeý basqarmasy basshysynyń aıtýynsha, atalǵan málimetterge saı, para alý, qyzmettik ókilettikterin asyra paıdalaný, jezókshelikpen aınalysýǵa arnalǵan oryndardy uıymdastyrý jáne olardy jasyrý, adamdardyń ómiri men densaýlyǵyna qaýip tóndiretin jaǵdaılardy jasyryp qalý faktileri boıynsha sotqa deıingi tergeý amaldary júrgizilýde.
Sonymen qatar, Sybaılas jemqorlyqqa qarsy qyzmet ókiliniń málimdeýinshe, qazirgi ýaqytta jezóksheler ordasynda jumys isteıtinderdi qosa alǵanda, 87 adam karantınge alynyp, oqshaýlanǵan. Olardyń ishinde eki shetel azamatynan koronavırýs ınfeksıasy anyqtaldy.
