Almaty qalalyq Qoǵamdyq keńestiń onlaın otyrysy barysynda Ulttyq saraptama ortalyǵynyń dırektory Arnur Nurtaev turǵyndardy ózin-ózi emdemeýge jáne dárihanaǵa barmaýǵa shaqyrdy.

– Mysaly, dene qyzýy sál ǵana kóterilgen adam dereý antıbıotık satyp alýǵa tyrysady. İs júzinde, vırýstyq pnevmonıaǵa antıbıotık kómektespeıdi, ol tıimsiz, óıtkeni antıbıotıkter bakterıalarǵa áser etedi, biraq vırýstarǵa emes. Bakterıaǵa qarsy preparattardy qabyldaý arqyly Siz ımýnıtetińizdi álsiretesiz, – dep túsindirdi A.Nurtaev.

Otyrys barysynda, medısına ǵylymdarynyń kandıdaty Rafaıl Qypshaqbaev vırýsqa qarsy preparattardy kóp mólsherde satyp almaýǵa shaqyrdy.

– Dárihanalardaǵy baǵanyń ósýine ózimiz kinálimiz. Ony ózimiz qoldan jasaımyz. Adamdar dárihanalarǵa baryp, vırýsqa qarsy dári-dármekterdi kóptep satyp alyp jatyr. Esińizde bolsyn, COVID-19 dárihanalardaǵy dáriler kómektespeıdi. Olardy satyp alýdyń qajeti joq. Álemde koronavırýsqa qarsy qoldanatyn dári áli tabylǵan joq, – dep túsindirdi dosent.

Óz kezeginde "SK-Farmasıa" JSHS basqarma tóraǵasy Berik Sháripov dárihanalardaǵy keıbir dári-dármekterdiń baǵasynyń ósýine baılanysty jaǵdaıdy túsindirdi.

– Jekemenshik dárihanalarda vırýsqa qarsy dáriler joq degen saýaldar týyndap jatyr. Biz jekemenshik dárihanalarǵa jaýap bermeımiz. Olar óz betinshe jumys isteıdi. Alaıda Densaýlyq saqtaý mınıstrliginde baǵany ósirmeý týraly buıryq bar. Mysaly, búgin baǵasy 10 teńge bolǵan dárini, erteń 1000 teńgeden satýǵa bolmaıdy. Dárihanalar satýǵa bolatyn shekti baǵadan aspaýy tıis. Eger dárihana osyndaı qadamdarǵa barsa, onda olar erejeni buzady. Tıisinshe, kez kelgen azamat zańsyz áreketter týraly shaǵymdana alady, – dep túsindirdi ol.

Derekkóz: QazAqparat