Dárigerdiń taǵaıyndaýynsyz qoldanylǵan antıbıotıkter ımýnıtetti álsiretip, densaýlyqqa zıan keltiredi — Almaty ınfeksıonısti. Bul týraly juqpaly aýrýlar bóliminiń bastyǵy, ftızıohırýrg, ftızıopýlmonologıa ortalyǵynyń pýlmonology Abzal Malbasqanov óńirlik komýnıkasıa qyzmetiniń alańynda ótken onlaın-suhbat barysynda aıtty. Ol turǵyndarǵa koronavırýs ınfeksıasyn, pnevmonıany óz betimen emdemeýge shaqyrdy.

A. Malbaskanov kóbine turǵyndar koronavırýs ınfeksıasyn ózderi emdeýge beıim ekendigin atap ótti.

«Koronavırýstyq pnevmonıa – vırýs týdyratyn aýrý. Antıbıotıkter-bakterıaǵa qarsy qoldanylatyn dáriler. Antıbıotıkterdi qoldaný arqyly ımýnıtetimizdi álsiretip, densaýlyǵymyzǵa zıan keltiremiz. Sondyqtan úıde antıbıotıktermen ózin-ózi emdeýge bolmaıdy», — dep túsindirdi A. Malbaskanov.

Infeksıonıst dárigerdiń túsindirýi boıynsha, aýrý belgileri baıqalǵan jaǵdaıda tez arada dárigerge júginý qajet. Aýrýdyń qalaı ótip jatqanyn, qaı deńgeıde ekendigin maman ǵana anyqtaı alady. Qosymsha klınıkalyq-rentgendik tekserýden ótip, arnaıy taǵaıyndaýdan keıin ǵana dárilik preparattardy qoldanýǵa bolady. Kóp jaǵdaıda osy prosedýralardan ótken naýqastar tolyq jazylýǵa múmkindik alyp jatyr.

«Keıbir adamdar halyqtyq emdeý ádisterine júginip jatyr. Onyń sońy ýaqytty tekke ótkizip alýmen, asqynýlarmen aıaqtalyp jatady. Keıin medısınalyq uıymdarǵa qabyldanǵannan soń emdeý sharalary basqa formada bolýy múmkin», — dedi ol.

Al aýrý belgileri paıda bolǵan jaǵdaıda qala turǵyndaryna tez arada medısınalyq qyzmetkerlerine júginý qajettigin aıtamyz. Sondaı-aq, sarapshy barlyq turǵyndy profılaktıkalyq sharalardy saqtaýǵa, salaýatty ómir saltyn ustanýǵa shaqyrady. Suraqtar týyndaǵan jaǵdaıda 1406 nemese 3000-505 nómirine habarlasý kerek.