Búgin Qazaqstanda uly oıshyl Abaı Qunanbaevtyń kúni atap ótilýde. Aǵymdaǵy jyl basynan beri Abaıdyń týǵan jeri Shyǵys Qazaqstandaǵy mańyzdy mádenı-tarıhı nysandarǵa jóndeý jumystary júrgizildi. Alaıda koronavırýs pandemıasyna baılanysty bul kúnge oraı josparlanǵan sharalar qashyqtyqtan uıymdastyrylýda.

 Semeıdegi alań jáne Abaı atyndaǵy teatr men murajaıda júrgizilip jatqan jóndeý jumystary aıaqtalýǵa jaqyn.

Alań jańasha kelbetke ıe boldy. Jazýshynyń eskertkishi jóndeldi. Teatrda tolyq qaıta qalpyna keltirý jumystary júrgizilgenine qaramastan atalmysh nysannyń tarıhı erekshelikteri saqtaldy. Sondaı-aq teatr aýmaǵynda abattandyrý jumystary jasalyp, ǵımarattyń ishki jáne syrtqy jaǵyna jóndeý júrgizilýde. Óner ordasy jaıly ári jaryq bolyp qaldy. Semeılikter men qala qonaqtaryn jańa sahna men kórermen zaly kútýde. Abaı murajaıy da jaqynda kelýshilerge esigin aıqara ashady. Onyń aýmaǵynda Abaıdyń uldarymen birge beınelengen eskertkishi boı kóteredi.

«Abaı-SHákárim» memorıaldyq keshenininde júrgizilip jatqan qaıta qalpyna keltirý jumystary da aıaqtalýǵa jaqyn qaldy. Semeıdegi Abaı atyndaǵy kitaphanaǵa da jóndeý jasaldy.

Aqshoqydaǵy Qunanbaı áýleti murajaıynyń qurylysy aıaqtalady. Munda kórme zalynan bólek, mektep oqýshylaryna sabaq ótkizýge múmkindik jasalady. Abaı dúnıege kelgen Syrt-Qasqabulaqtyń mańy abattandyrylady.

Búgin, Shyǵys Qazaqstanda uly aqynnyń 175 jyldyq mereıtoıyna oraı barlyq qala men aýdandaǵy Abaıdyń eskertkishterine gúl shoqtaryn qoıý rásimi ótti. Semeıdegi shyǵarmashylyq zıaly qaýym ókilderi SHQO ákimi Danıal Ahmetovpen birge Abaı Qunanbaevtyń eskertkishine gúl shoqtaryn qoıdy.

Sondaı-aq onlaın rejımde XXI respýblıkalyq Abaı oqýlarynyń oblystyq kezeńi uıymdastyryldy. Baıqaý barysynda jalpy orta bilim beretin jáne oblystyq mamandandyrylǵan mektepterde uly aqynnyń murasy qaıta jańǵyrdy. Balalar ónerlerin ortaǵa salyp, Abaı óleńderi men Shákárim Qudaıberdiulynyń, Aqylbaı Maǵaýıaulynyń, Maǵaýıa Abaıulynyń naqyl sózderin mánerlep, jatqa oqydy. Budan bólek Abaıdyń oryndaýyndaǵy ánderi men kúılerin oryndap, ataqty jazýshynyń shyǵarmashylyǵynan syr shertetin esse jazdy.

«Úzdik mánerlep oqýshy» atalymyna semeılik bes jasar búldirshin Bota Talǵat ta úmitker bola alady. Búgin Abaı Qunabaevtyń 175 jyldyǵyna oraı búldirshin aqynnyń 20-dan astam óleńin oqyp, ánderin oryndap berdi.

S.Amanjolov atynlaǵy SHQMÝ-da Vengrıa men Túrkıa elderindegi JOO-y oqytýshylarynyń qatysýymen onlaın semınar ótti.

Jalpy, aǵymdaǵy jyl basynan beri SHQO-daǵy mádenıet, arhıvter jáne qujattama basqarmasy 20 shara ótkizýdi josparlaǵan edi. Onyń ishinde birnesheýi onlaın formatta uıymdastyryldy. Oǵan ádebıettanýshylar, jazýshylar men aqyndar, sondaı-aq shyǵarmashylyq jaǵyna bet burǵan jastar qatysty. Sonymen qatar abaıtanýshy ǵalym Ǵarıfolla Esimniń qatysýymen «Aǵa Sultan Qunanbaı: ańyz ben aqıqat» atty oblystyq ǵylymı-tájirıbelik konferensıa  qashyqtyqtan ótti. Budan bólek qazaq tili men ádebıeti pániniń muǵalimderine arnalǵan «Abaı saǵaty» uıymdastyryldy. Ony abaıtanýshy, oqytýshy Aıjan Kartaeva júrgizdi.