Ulttyq qoǵamdyq senim keńesiniń quramynda birqatar ózgerister boldy. Rotasıa aıasynda qoǵamdyq keńesten bes adam shyǵarylyp, keńes músheligine jańadan azamattar qabyldandy. Jalpy keńes quramynyń ózgerýine baılanysty qoǵamdyq pikir eki tarapqa bólindi. Bir tarap keńes músheliginen shyǵarylǵan azamattar halyqtyń úmitin aqtamady dep túsindirse, ekinshi tarap halyq pen bılik arasyn jaqyndastyratyn kópir ekenin jetkizdi. "Qamshy" tilshisi birneshe saıasattanýshylarmen sóılesip, Ulttyq keńestegi ózgerister týraly pikirin bildi. 

"DAT" opozısıalyq basylymynyń jetekshisi, jýrnalıs Ermurat Bapı Ulttyq keńestiń qoǵamǵa da, elge de, halyqqa da paıdasy joǵyn atap ótti.

– Ulttyq qoǵamdyq senim keńesi qurylǵaly eshqandaı da mısıa oryndalǵan joq. Bul komısıa kóz aldaý komısıasy boldy. Áý bastan qoǵamnyń oǵan senimi bolmady. Sebebi olar strýktýradan tys, eshqandaı da ókilettigi joq qurylǵan komısıa bolatyn. Aıtylǵan usynystardyń kópshiligi qabyldanbaı qaldy. Onyń quramynda bolǵan azamattarǵa senimsizdik boldy. Sondyqtan kezekti rotasıa, ózgeris degenniń barlyǵy bos tirlik. Ulttyq keńestiń qoǵamǵa da, elge de, halyqqa da paıdasy joq. Ánsheıin bir aldaýsyratý amalymen jasalǵan áreketter. Eshqandaı da jańashyldyq bolmaıdy. Óıtkeni keńes músheliginde bar azamattardy estıtin qulaq joq. Máselen alǵashqy otyrystarda biraz máseleler kóterilip, usynystar aıtyldy. Biraq onyń bári sóz júzinde qaldy. Sondaı-aq, mıtıńke shyqqan qoǵam belsendilerin qamaýǵa alyp, biraz azamattarymyzdy sottap jatsa da bul komısıa ún qatpaıdy. Tipti qoǵamdyq qýdalaýlar áli de jalǵasyp jatqany belgili. Eger de bul komısıanyń zańmen ókilettigi bolyp, oǵan bıliktiń tarapynan shynynda da qoǵammen kelisim jasaýǵa ynta-yqylasy bolsa onyń nátıjesi bolar edi, – dep aıtty Ermurat Bapı.

Eýrazıalyq ıntegrasıa ınstıtýtynyń sarapshysy Samat Nurtazanyń aıtýynsha, Ulttyq keńeske jańadan kirgen azamattar sózdiń emes, istiń adamdary. 

– Ulttyq keńesten shyqqan adamdar týraly eshteńe aıta almaımyn. Óıtkeni olardyń bitirgen sharýasyn kórmedim. Al keńes músheligine qabyldanǵan azamattarǵa oń kózqarastamyn. Qazirgi keńes músheligindegi adamdar sózdiń emes, istiń adamdary. Shyny kerek osy ýaqytqa deıin ulttyq keńeste bolǵan keı azamattar artylǵan úmitti aqtamady. Qazir keńes músheliginde 44 azamat bolsa, solardyń 80-90 paıyzy ǵana óz mısıasyn oryndap otyr dep aıtýǵa bolady. Al, keıbir adamdardyń sol orynǵa qalaı barǵany meni tańqaldyratynyn da jasyrmaımyn. Men ol adamdardy múshelikke kirgizbes edim.

Qoǵam belsendisi "Ulttyq keńes – halyq pen bılikti jaqyndastyratyn kópir" dep esepteıdi.

– Jalpy ulttyq keńes bizdiń qoǵamǵa qajet. Ol – prezıdent pen eldi jaqyndastyratyn rýhanı kózge kórinbeıtin kópir. Munda olar halyqtyń muń-muqtajyn, problemasyn jetkizip otyrady. Eger de halyqtyń problemasy bılikke jetip, ol óz sheshimin taýyp jatsa onda nátıjeni kórýge bolady. Keńes músheligindegi 44 adamnyń óz mısıasyn oryndap otyrǵany onyń sol jumysynan kórinedi, – dep sózin túıindedi Samat Nurtaza.

Al opozısıalyq saıasatker Jasaral Qýanyshalın "Ulttyq qoǵamdyq  senim keńesinen paıdaly dúnıe, ózgeris kútý – bekershilik" degen pikirde.

– Ulttyq keńes – meniń paıymdaýymsha óli dúnıe. Bastan-aq onyń jaǵdaıy belgili bolǵan. Keńes músheligine kirgender bılikke unamdy, qolaıly, jaǵymdy adamdar. Bular eshqandaı da ózgeris alyp kelmeıdi jáne esh ózgeris oryn almaıdy. Bul keńes qoǵam múddesine jumys istemeıdi, ıaǵnı bularǵa joǵarydan qandaı tapsyrys, buıryq keledi sony oryndap qana otyrady. Olardan paıdaly dúnıe, ózgeris kútý – bekershilik. Keńes múshelerin qansha aýystyrsa da ózgeris bolmaıdy. Bular eldi, qoǵamdy, halyqty aldaýsyratyp, áreket etip jatqandaı túr kórsetetin qýyrshaq, jalǵan keńes, – dedi ol.

"Halyqqa adal qyzmet" (HAQ) partıasyn qurý boıynsha bastamashyl top jetekshisi Toǵjan Qojalıevanyń sózinshe, keńes músheliginde bolǵan azamattar óz mısıasyn oryndaı almaǵan.

– Ulttyq keńeste bolǵan azamattar ózderiniń mısıasyn oryndaı almady. Óıtkeni olardy tyńdaıtyn adam, estıtin qulaq joq. Olardy úkimet te, májilis te tyńdamaıdy. Mysaly Aıdos Sarym syndy azamattar mıtıń týraly zańǵa qanshama usynystar aıtty. Biraq birde-bir usynys májilisten ótken joq. Jalpy keńes músheliginde bar adamdardyń aıtqan usynystaryn oryndaıtyn májilis bolmasa qansha adam keńeske qabyldansa da, olardyń eshqandaı da qoǵamda róli bolmaıdy.

Jalpy osy ýaqytqa deıin Ulttyq keńestiń paıdasy da bolmady. Onyń birden-bir dáleli, mıtıń týraly, partıalar týraly zańǵa eshqandaı ózgerister engizilmedi. Bastapqyda ózgeris bolatynyna sendirdi. Biraq ol is júzinde qaldy. Tek bireń sarań ózgerister engizilgeni bolmasa, onyń bizdiń saıası júıemizge eshqandaı da paıdasy bolǵan joq. Jańadan kelgen azamattardan eshteńe de kútpeımin, báribir de nátıje bolmaıdy, – deıdi Toǵjan Qojalıeva.