Qasym-Jomart Toqaev mınıstr Maǵzum Myrzaǵalıevtiń saladaǵy atqarylyp jatqan jumystarynyń esebin tyńdady.

Prezıdentke elimizde balyq sharýashylyǵyn damytý perspektıvalary týraly baıandaldy. Mınıstrdiń deregine súıensek, 2019 jyly balyq jáne balyq ónimderi naryǵynyń jalpy kólemi 66 myń tonnany quraǵan. Onyń ishinde balyq aýlaý – 45 myń tonna, balyq ósirý – 7,4 myń tonna, balyq ımporty – 43,5 myń tonna, eksporty – 30 myń tonnaǵa jetken. Ǵalymdardyń paıymdaýynsha, eldegi sýqoımalarda jylyna 600 myń tonnaǵa deıin balyq ósirýge múmkindik bar.

Qasym-Jomart Kemeluly qolda bar múmkindikterdi paıdalaný qajettigin aıtty. Mınıstrlikke barlyq oblystarmen birlese otyryp, osy jyldyń qarasha aıyna deıin balyq sharýashylyǵyn damytýdyń óńirlik baǵdarlamalaryn ázirlep, bekitý tapsyryldy.

Kezdesýde óńirlerdegi ekologıalyq jaǵdaıǵa erekshe mán berildi. Mınıstrdiń aıtýynsha, qazirgi ýaqytta qoǵammen birlese otyryp Almaty, Temirtaý qalalarynyń jáne Atyraý, Aqtóbe, Pavlodar oblystarynyń ekologıalyq máselelerin sheshý jónindegi jol kartalary ázirlengen.

Prezıdent naqty ındıkatorlardy anyqtaı otyryp, elimizdiń óńirlerindegi ekologıa men atmosferalyq aýany jaqsartý boıynsha belsendi ári tıimdi jumysty jalǵastyrýdy tapsyrdy.

Qasym-Jomart Toqaevqa "Janýarlarǵa jaýapkershilikpen qaraý týraly" zań jobasynyń ázirlenip jatqany týraly aqparat berildi. Memleket basshysy ásirese óskeleń urpaqty tárbıeleýde bul qujattyń mańyzdylyǵyn atap ótti.

Maǵzum Myrzaǵalıev prezıdentke Qazaqstannyń ulttyq parkterinde ekologıalyq týrızmdi damytýdyń josparyn usyndy. Jospardy iske asyrý arqyly ekologıalyq týrızm salasyna 70 mlrd teńgege deıin jeke ınvestısıalardy tartýǵa, 4 myńǵa deıin jańa jumys oryndaryn ashýǵa múmkindik beredi.

Prezıdent ulttyq parkterdiń áleýetin nyǵaıtýdy mindettep, ekologıalyq týrızmdi ilgeriletý jumysyn jalǵastyrýdy tapsyrdy.

Suhbattasý barysynda geologıalyq barlaý salasynyń máseleleri qozǵaldy. Qasym-Jomart Toqaev Qazaqstannyń nazardan tys qalǵan jáne keleshegi bar baseınderin zertteýge jáne olardy ıgerý maqsatynda ınvestısıa tartýǵa kúsh jumyldyrý qajettigi týraly aıtty.

Maǵzum Myrzaǵalıev budan basqa óńirlerde sýarylatyn jerlerdi engizý jáne jańa sýqoımalarynyń qurylysy boıynsha atqarylyp jatqan jumys týraly aıtty. Memleket basshysy sýarylatyn jerlerdi engizý boıynsha júrgizilip otyrǵan jumysqa jaqsy baǵa berip, sý únemdeıtin tehnologıalarǵa jáne sý salasyn sıfrlandyrýǵa jedeldetip ótýdi tapsyrdy.