Prezıdent Nursultan Nazarbaev QR Qaýipsizdik keńesin jedel jınady. Bul týraly «Qamshy» portaly Tengrinews.kz-ke silteme jasaı otyryp habarlaıdy.

Aqordadaǵy keńeske Qaýipsizdik keńesiniń turaqty músheleri men memlekettik organ basshylary qatysqan. Aqordanyń málimetinshe, keńeste organdardyń qyzmetin jetildirý, taldaý jáne boljaý jumystarynyń sapasyn arttyrý máseleleri men   ınflásıalyq targetteý rejıminiń negizindegi jańa aqsha-kredıt saıasatyn júzege asyrýǵa ótý, valúta dálizin alyp tastap, erkin aýytqý dálizine ótý týraly máseleler qarastyrylǵan.

Sondaı-aq,  Memleket basshysy syrtqy naryqtardaǵy úderisterdi muqıattylyqpen monıtorıńteý, ahýaldyń ózgerýin, yqtımal táýekelder men qaterlerdi baǵalaý, sondaı-aq oqıǵalardyń damýyn boljaý negizinde aldyn alý sharalaryn ázirleý qajettigin atap ótken.

Qazaqstan Prezıdenti memlekettik organdardyń áleýmettik-ekonomıkalyq damý, sondaı-aq bes ınstıtýsıonaldyq reformanyń jáne "Nurly jol" baǵdarlamasynyń strategıalyq mindetterin júzege asyrý jónindegi jumystary el ishindegi jáne álemdegi jaǵdaıdy jan-jaqty taldaýǵa negizdelýi tıis ekendigin aıtty.

Aıta keteıik, 20 tamyzda QR Úkimeti Ulttyq bankpen birigip, teńgeniń erkin aýytqý baǵamyna ótý týraly sheshim shyǵardy. Mundaı sheshim álemdik ekonomıkadaǵy jaǵymsyz faktorlardyń kúsheıýiniń negizinde qabyldanǵan.  
 

Nurzat Toǵjan