Almatylyq Órikgúl Ádilbekovanyń Reseı prezıdenti Vladımır Pýtınge madaq ánin jubaıy Shámil Ábiltaı notaǵa túsirdi. Oryndaýshy Talǵat Kúzenbaev ándi Vladımır Pýtınniń aldynda shyrqaýdy armandaıdy.
Ǵalamtorda Youtube saıtynda júrgen«Vladımır Pýtın» atty ánniń avtory almatylyq Órikgúl Ádilbekova bul shyǵarmanyń dúnıege kelýine 2014 jyly kóktemde Ýkraına men Reseı arasyndaǵy jaǵdaıdyń shıelenisýi sebep bolǵanyn aıtady. Bul týraly "Qamshy" portaly azattyq.org-ke silteme jasaı otyryp habarlaıdy.
Avtor áý basta Pýtınge arnap án shyǵaramyn dep oılamaǵanyn, biraq telearnadan Ýkraınanyń shyǵysyndaǵy Donbasta bolyp jatqan qandy oqıǵalardy baıandaıtyn habarlardy kórip otyrǵanda, kókeıine óleń joldary men án áýeni qatar kelgenin aıtady.
– Úshinshi dúnıejúzilik soǵys bastalyp kete me dep qaýiptendim. Reseı bizge áýelden jaqyn el, jaqsy kórshi ǵoı. Jan-jaqtan qysyp jatqanda Reseı prezıdenti Vladımır Pýtınniń qarsy kúsh qoldanbaı, shydamdylyq tanytqanyna rıza boldym. Bul – beıbitshilikti nasıhattaýǵa arnalǵan án. Ol úshin áldene dámetý oıymda da joq, - deıdi án avtory.
Buryn Almatydaǵy Muhtar Áýezov atyndaǵy teatrdyń ártisi bolǵan Órikgúl Ádilbekova ándi kúıeýi Shámil Ábiltaıdyń notaǵa salyp óńdegenin aıtty.
Qazaqstan prezıdenti Nursultan Nazarbaevqa arnap «Azattyq asýy» áni men «Qazaqstan – Nursultan» kúıin shyǵarǵan, Nazarbaevtyń sózine «Shubarat» ánin jazǵan kompozıtor Shámil Ábiltaıdyń sózinshe, áıeliniń Pýtınge arnaǵan áni ózine qatty unǵan eken. Án áýenin óńdeý barysynda, Shámil Ábiltaı ándi dombyraǵa salyp óńdep, án sózin orysshaǵa aýdarýdy usynypty.
Onyń aıtýynsha, opera ánshisi Talǵat Kúzenbaev orys tilinde oryndaǵan jańa án kompakt-dıskige jazylyp, byltyr Vladımır Pýtınge poshtamen jiberilgen. Án avtory Órikgúl Ádilbekova «Eýrazıa ekonomıka odaǵy aıasynda tabysqa jetýge» tilektestigin jazyp, Kreml basshysyna hat joldaǵan. Al bıyl naýryz aıynda Reseı prezıdenti ákimshiliginen Qazaqstannan sálemdemeni alǵany týraly jaýap hat alǵan.
Shámil Ábiltaıdyń aıtýynsha, ol «Vladımır Pýtın» áni jazylǵan úntaspany ózge ánderimen birge Qazaqstan prezıdenti Nursultan Nazarbaevqa da joldaǵan eken. Kóp keshikpeı prezıdent ákimshiliginen kompozıtorǵa alǵys bildirgen hat kelgen. Onda: «Prezıdent ákimshiliginiń jaýapty qyzmetkeri Ótegen Oralbaev arqyly berip jibergen óz oryndaýyńyzdaǵy ánderińiz ben kúılerińiz jazylǵan kompakt-dıskilerińizdi aldyq. Solardy memleket basshysyna usynar kezde prezıdentke ózińizdiń jeke joldaǵan hatyńyz ben dıskilerińiz de kelip jetti.» dep jazylǵan.
«Vladımır Pýtın» ániniń oryndaýshysy, Almatydaǵy Abaı atyndaǵy Qazaq memlekettik akademıalyq opera jáne balet teatrynyń ánshisi, Qazaqstannyń memlekettik ánuranyn oryndaýshy Talǵat Kúzenbaev bul ándi án arnalǵan Reseı prezıdenti Vladımır Pýtınniń aldynda oryndaýdy armandaıdy eken.
El mádenıeti qanshalyqty jurttan arashalanyp, daralanyp turǵanymen dara patshalyq júıe rýhanı sanamyzdan áli aryla qoımaǵan eken. Bıligi myqtyǵa bas ıgen quldyq sana óz qudiretimen mádenıet salasyn da qur aınalyp óte almapty. Reseıge táýeldilikti aıqyndaıtyn bir dálel retinde qazaqtyń betke ustar baǵylandary "Vladımır Pýtınge" jyr arnap kósilip júrgende jetkenmiz belgili eken.
Gúlden Ábdibaqyt
