Almaty qalasyndaǵy Asfendıarov atyndaǵy Medısına ýnıversıtetiniń 116 stýdenti Jambyl oblysynyń búdjetinen bólingen qarjy boıynsha tegin bilim alyp kelgen edi. Bul týraly "Qamshy" portaly KTK telearnasyna silteme jasaı otyryp habarlaıdy.

Bastapqydaǵy úshjaqty kelisim boıynsha oqý aqysyn oblys ákimdigi tólemek bolǵan. Biraq bul kómek kezinde Jambyl oblysyndaǵy maman tapshylyǵyn joıamyn degen nıetpen osyndaı uıǵarym jasaǵan Qanat Bozymbaev basqa aımaqqa basshy bolyp ketisimen múldem toqtap qalypty. 

Endi, ári qaraı bilim alamyn degen túlek ótken oqý jyly úshin 400 myń teńge tóleýge mindetti. Buǵan qosa, ár jyl saıyn 800 myń teńge oqý aqysyn da ózderi tóleıdi. Biraq ákimdik grantymen bilim alyp kelgenderdiń bári turmysy tómen otbasydan shyqqandar. Al eger tıisti aqshany tólemese, 25 tamyzdan bastap oqýdan shyǵarylmaq. Dáriger bolsam degen 116 túlektiń armany osylaısha atqaminerlerdiń kesirinen kókke ushqaly otyr.

O basta mektep túlekterine úmit syılap, tegin oqytamyz degen ákimdik ókilderi endi tilshilerge de túsinikteme berýden bas tartty. Jaqyn arada máselege qatysty kezekti sot otyrysy ótpek. Al birinshi sot otyrysynda jambyldyq jastarǵa shkeneýnikter bólgen granttyń zańsyz ekeni anyqtalǵan. Bir anyǵy, oblys búdjetinde jyl saıyn ár stýdentke 800 myń teńge tóleıtindeı qarjy da joq eken.

Al medısına ýnıversıtetiniń basshylyǵy kútýge qaýqarsyz. Dáriger bolýdy armandaǵan stýdentter endi jańa oqý jyly bastalar tusta oqýdan shyǵarylmaq. Sheneýnikterden qaıyr bolmaı, ábden úmiti úzilgender sottan shaǵymdaryn qaıtyp alyp jatyr. Al oqý aqysyn daýlaǵan 116 shákirttiń otyzǵa jýyǵy oıymyzdaǵyny oryndatpaı qoımaımyz dep otyr.