Aqmola oblysy Shýchınsk qalasynda Lexus avtokóliginiń qatysýymen jol apaty bolyp, eki polıseı qaza tapty. Oqıǵa syrtqy beınebaqylaý kamerasynyń obektıvine túsip qalǵan, dep habarlady Aqmola oblysy PD-nyń baspasóz qyzmeti.

Qaıǵyly oqıǵa 15 qazanda Shýchınsk qalasyndaǵy Abylaı han jáne Seıfýllın kósheleriniń qıylysynda bolǵan.

"Abylaı han kóshesimen kele jatqan Lexus NX 200 avtokóliginiń júrgizýshisi Býrabaı ÓKM jergilikti polısıa qyzmeti bóliminiń Lada 21214 qyzmettik avtokóligimen soqtyǵysqan.

LADA 21214 qyzmettik avtokóliginiń júrgizýshisi men jolaýshysy - Býrabaı APB JPQ ýchaskelik polısıa ınspektorlary. Alǵan jaraqattarynan olar oqıǵa ornynda qaıtys boldy" delingen habarlamada.

Apatqa Shýchınsk qalasynyń 25 jastaǵy turǵyny kináli bolyp shyqty. Buryn ol QK-niń "avtomobıldi nemese ózge de kólik quralyn urlaý maqsatynsyz zańsyz ıelený", sonymen qatar "kólik quraldaryn júrgizý quqyǵynan aıyrylǵan jáne alkogóldik, esirtkilik jáne ýytqumarlyq masań kúıdegi adamnyń kólik quralyn basqarýy, sol sıaqty kólik quralyn basqarýdy osyndaı adamǵa berý nemese osyndaı adamnyń kólik quralyn basqarýǵa jiberilýi" baptary boıynsha birneshe ret sottalǵan.

Jigittiń 2022 jylǵa deıin rúlge otyrýǵa quqyǵy joq ekeni belgili boldy. Qaıǵyly oqıǵadan keıin ol qamaýǵa alyndy.

"Qazirgi ýaqytta atalǵan fakti boıynsha qylmystyq kodekstiń 345-baby 4-bóligi "kólik quraldaryn basqaratyn adamdardyń jol qozǵalysy nemese kólik quraldaryn paıdalaný erejelerin buzýy" boıynsha sotqa deıingi is qozǵaldy" dep tolyqtyrdy polısıa departamendegiler.