Janbolat Aǵadil qazasyna baılanysty iste kúdikti retinde ustalǵan Ómirjan Rahmettiń advokaty Jandos Tuıaqov sot sheshimi shyqpaıynsha kúdikti delingen adamnyń "qylmysty jasaǵanyn moıyndaǵan" vıdeosyn jelige shyǵarý zańsyz ekenin aıtyp, vıdeony túsirip, jelige júktegen azamattardy jaýapkershilikke tartý úshin prokýratýraǵa shaǵym daıyndap jatqanyn jetkizdi.
– Biz bul isti moıyndamaımyz. Áleýmettik jelide "Janbolat Aǵadildi abaısyzda pyshaqtadym" dep taraǵan vıdeoúndeý zańsyz. Sot sheshimi shyqpaı mundaı vıdeony halyqqa arnap shyǵarý da durys emes. Zańsyz túsirip, jelige júktegen azamattardy jaýapkershilikke tartý úshin prokýratýraǵa arnaıy shaǵym daıyndap jatyrmyz. Birinshiden, vıdeo túsirý prosesi eshkimniń qatysýynsyz júzege asyrylǵan, ekinshiden, bul tergeý amaldary emes. Máselen tergeý amaldarynda vıdeoǵa túsirý ruqsat etilgen. Biraq onda advokat qatysady. Al munda tergeýge arnalmaǵan, is materıaldarda joq dúnıe. Kúdiktiniń kináliligin tek sot sheshedi. Halyqqa aldyn ala jarıalap, olardyń oıyn qalyptastyrýǵa eshkimniń quqyǵy joq. Vıdeonyń quqyq qorǵaý organdarynda túsirilgeni belgili, – deıdi zańger.
Advokat kisi ólimine soqtyrǵan qylmystyq istiń astarynda saıası astar joq dep sanaıdy.
– Munda eshqandaı da saıasat, saıası aıatar syndy másele múldem joq. Kádimgi qylmys bolǵan. Qazirshe sot sheshimi shyqpaıynsha, bizge istiń mán-jaıyn ashyp aıtýǵa ruqsat joq. Biraq bul jerde naqty kimniń adam óltirgeni anyqtalmaı jatyr. Biz ázirshe Ómirjannyń kinási joq sanaımyz, – dep aıtty Jandos Tuıaqov.
Qoǵam belsendisi Janbolat Mamaı "tergeý aıaqtalmaı jatyp vıdeo taralýyna qaraǵanda istiń saıası astary bar" degen pikirde.
– Bul iste kúmán týdyratyn ister óte kóp dep oılaımyn. Sebebi bir kúnniń ishinde "kúdiktimin, men pyshaqtadym" degen jas balanyń vıdeosy shyǵa keldi, artynsha kúdiktiniń anasy birneshe "ótirik boldy" dep málimdeme jasap jatyr. Resmı organdardyń keltirip otyrǵan derekterine óz basym senbeımin. Eger qylmysqa eshqandaı saıasattyń qatysy joq bolsa jáne arnaıy tapsyrys, qoldan uıymdastyrylǵan jaǵdaı bolmasa, onda polısıa qyzmetkerleri atalǵan isti ashyq, ádil tergep, qylmys jasaǵan azamatty jaýapkershilikke tartýy kerek.
Áleýmettik jelide taraǵan vıdeonyń qaıdan shyqqany áli kúnge deıin belgisiz. Bizdiń zańnamada sot sheshimi shyqpaı eshqandaı vıdeo taratýǵa bolmaıdy. Óıtkeni kúdiktilerdiń eshqandaı qylmystary dáleldengen joq. Birneshe saǵattyń ishinde qylmysty dáleldep, ashyp tastaý múmkin emes. Sondyqtan qylmysta kúmándi ister óte kóp. Polısıanyń osylaı jasyryn áreket etip, qıturqy áreketterge baryp jatqanyna qaraǵanda iste saıası astar bolýy ábden múmkin. Kúdikti Ómirjan Rahmet óziniń kinásiz ekenin ashyqtan-ashyq aıtyp otyr. Azaptaý, uryp-soǵý, qorqytý arqyly qylmys jasamaǵan adamdardyń ózine qylmysty ilip, jazyqty etip jatatyn jaıttar bizdiń Qazaqstanda kóp bolady. Men buǵan tańǵalmaımyn. Sondyqtan men polısıanyń sózine qaraǵanda, Ómirjan Rahmettiń "men óltirgen joqpyn" degen sózine senemin. Eger de tergeý jumystar ashyq túrde júrgizilmese, onda men bul – saıası tapsyryspen jasalǵan is dep kesip aıtamyn. Dál qazirgi ýaqytta saıasattyń qatysy bar. Aldaǵy ýaqytta qylmystyq is aıqyndalady dep sanaımyn, – deıdi Mamaı.
Kúdiktiniń anasy, İ toptaǵy múgedek Inabat Abdıeva "balamdy vıdeoǵa túsirgen adamnyń kim ekeni áli belgisiz" dep otyr.
– Balamdy tergeý ızolátoryna túskeli áli kórgen joqpyn. Maǵan juma kúni balammen kezdesý úshin ótinish jaz degen. Ótinish jazdym. Úsh kúnnen keıin ruqsat beriletinin aıtty. Alaıda keshe balammen júzdesýge barsam, kirgizbedi. Ne úshin ótinishimdi qabyldamaǵanyn surasam balamnyń jazǵan ótinishi kerek ekenin aıtty. Búgin advokatymyz ekeýmizdiń ótinishimizdi alyp, ótkizdi. Endi kezdesý úshin erteńgi kúndi kútip otyrmyn. Balamdy vıdeoǵa túsirgen adamnyń kim ekeni áli belgisiz. Prokýratýraǵa shaǵym túsirdim, olardan surasam "bilmeımiz" dep basyn alyp qashady. Balam vıdeoda qoryqqanynan aıtyp otyr. Ol jerde "men óltirdim" dep aıtpaǵan. Balam o bastan "men bilmeımin", "moınyma almaımyn" dep otyr eken. Ol kimdi óltirip, ne bolǵanyn bilmeıdi. Surastyra kele sol kúni oqıǵa bolǵan jerde balalardyń bárinde pyshaq bolǵanyn bilip jatyrmyz. Biraq solardyń barlyǵyn nege jibere salǵanyn túsinbeı otyrmyn. Qazir olar bostandyqta júr. Ózderi óltirip alyp, balamdy "podstavıt" etip otyr. Olarǵa "óltirdi" degen kúdikti kerek boldy. Janbolat Aǵadildiń úıine baryp týystaryna kóńil aıttym. Anasynyń aıtýynsha, 25 balanyń eshqaısysy pyshaqty kim suqqanyn bilmeıdi. Menińshe ókimetke Janbolat Aǵadildi óltirý qajet bolǵan sıaqty, – deıdi kúdiktiniń anasy.
11 qarashada kúni Nur-Sultanda azamattyq belsendi Dýlat Aǵadildiń uly Janbolat Aǵadildi pyshaqtap óltirip ketkeni habarlandy.
Máıitti kórýge kirgen marqumnyń aǵasy Tańat Jalmaǵambetov Janbolattyń denesinen pyshaq jaraqatynyń izderin kórgenin aıtqan.
12 qarashada ishki ister mınıstrligi tergeý departamenti Janbolat Aǵadildiń ólimine qatysy bar delingen kúdiktiler ustalǵanyn málim etti.
Artynsha áleýmettik jelide Janbolat Aǵadilge "tóbeles kezinde abaısyzda pyshaq urdym" degen adamnyń vıdeosy taraǵan. Uzamaı vıdeodaǵy adam shynymen de kúdikti ekeni anyqtalǵan. Alaıda kúdiktiniń múgedek anasy "balasyna tanystary jala jaýyp otyr" dep sanaıtynyn aıtqan.
Keshe belgili zańger Abzal Quspan Facebook paraqshasynda "Janbolat Aǵadildiń ólimine qatysty: polısıa beınematerıaly zańsyz taratylǵan" degen ataýmen vıdeo jarıalady.
Pikir qaldyrý