Álem sportshylarynyń Qazaqstan dese, bir tyrnaqtary búgýle qalatyn ádet paıda bolsa kerek. Jaqynda Golovkınniń kezekti qarsylasy, orta salmaqtaǵy IBF chempıony Davıd Leme óz Tvıtter akkaýntyna Borattyń fotosyn júktegen. Bul týraly «Qamshy» portaly Nur.kz-ke silteme jasaı otyryp habarlaıdy. 

Osylaısha, kanadalyq sportshy qazaqstandyq Gennadıı Golovkınmen jekpe-jek aldynda ázildespek bolǵan.

“Halaıyq, osy ýaqytqa deıin myna jigit (Borat – red. eskertpesi) kelmeı turyp, Qazaqstandy bildik dep ózgelerdi aldamaı-aq qoıyńdar.  GGG odan keıin keldi (jaı qaljyń, renjip júrmeńder)”, – dep jazǵan boksshy.

Eske salsaq, Leme men Golovkın arasyndaǵy jekpe-jek 17 qazanda Nú-Iorktegi Madison Square Garden arenasynda ótedi. Ol HBO telearnasynda aqyly translásıa júıesi arqyly (PPV) kórsetiletin bolady. Qazaqstanda bul jekpe-jekti “Qazaqstan” arnasy kórsetedi.

Aıta keterligi, osydan birneshe kún buryn stambýldyq “Galatasaraıdyń” fýtbolshysy Lýkash Podolskı de Borattyń fotosyn Tvıtterge júktep, ázildegen bolatyn. Túrkıalyq fýtbolshy bastaǵan komanda Chempıondar lıgasynda “Astana” komandasymen kezdesetin bolady.

Sonymen qatar, fınlándıalyq “HIK” komandasy da “Astana” jankúıerlerin mazaq etetin Borattyń fotosy qoıylǵan sýretterdi jarıalaǵan bolatyn.