Reseıdiń memlekettik dýma depýtaty Evgenıı Fedorov "Belarýs ınfo" ýoutube arnasyna bergen suqbatta "Qazaqstan Reseıge óz aýmaǵyn qaıtarýǵa tıis" degen málimdeme jasap, áriptesi Vácheslav Nıkonovtyń aıtqany durys ekenin jetkizdi.

– Elestetip kórińiz, siz óz joldasyńyzǵa avtokólik syıladyńyz, artynan bir jyldan soń kelip "Vasá, meniń syılyǵym qalaı?" dep suraısyz. Al, ol sizge "qaıdaǵy syılyq? Men bul avtokólikti senen óndirip alǵanmyn nemese basqa dúnıege istegenmin" dese qalaı? Ol adamnyń sizge joldas emes ekenin túsinesiz. Sebebi deni durys adam "keremet syılyq nemese nashar syılyq" dep aıtyp, alǵysyn bildirip, "keıin qaıtaramyn" dep aıtady, – dedi Evgenıı Fedorov.

Depýtattyń aıtýynsha, Reseı Qazaqstanǵa "jerdi qaıtaryńdar" dep talap qoıýy kerek. 

– Qazaqstannyń resmı organdary "biz eshqandaı syılyqty bilmeımiz, bul – syılyq emes, biz senderden tartyp aldyq" dep jatyr. Bul jer ıa syılyq, ıa bolmasa tartyp alynǵan bolýy kerek. Onda qazaqstandyqtar, sizdermen basqasha sóılesip kóreıik. Bir orys adamnyń jerdi syıǵa bergenin bilý bir basqa, al bul jerdegi máselede sender aldyńdar da túkirip tastadyńdar. Bul jerde Qazaqstannyń SİM solaı istep jatyr. Biz (Reseı-red) jer aýmaǵyn bólý kezinde 1991 jyly qabyldanǵan sheshimderdi qarap shyǵaıyq desek, moraldi turǵydan ǵana shekteý bolyp tur. Qazaqstanmen dos sıaqtymyz, olarmen janjaldasýdyń keregi joq sıaqty. Biraq sender bizdiń syılyqty mise tutpasańdar, dos bolmasańdar, sender bizdiń qolymyzdy baılap otyrsyńdar. Reseı "eger bizdiń syılyqty moıyndamasańdar, qaıtaryp berińder. Sebebi sender ony zańsyz aldyńdar" dep talap qoıýy kerek. Nege zańsyz? Sebebi KSRO-nyń aýmaǵynan bólinip shyqqan memleketter sol quramǵa kirgen kezde ıelengen jerlerdi ótkizýi kerek degen zań bar, Qazaqstan da osy orys tilinde jazylǵan zańǵa daýys bergen. Qazaqstan KSRO-dan jerdi jalǵa alǵan. "Joldas Nazarbaev, Toqaev, SİM ketkilerińiz kelse, "chemodandaryńyzdy" alyp ketińizder" deý kerek. Sol kezde olar "baratyn jerimiz joq" deıdi. Al oǵan bizdiń qatysymyz qansha? – dedi depýtat.