Garvard astronomıa kafedrasynyń meńgerýshisi Avı Loeb "bógde ǵalamsharlyqtar 2017 jyly kelgen jáne budan keıin kóbirek keledi" dep sanaıdy. Bul týraly The New York Post basylymy habarlady.

Profesor  jaqyn arada jaryq kóretin "Jerden tys ıntellektýaldy ómirdiń alǵashqy belgisi" kitabynda 2017 jyly  Kún júıesine kirgen aspan denesiniń basqa emes, bógde ǵaryshtyq tehnologıa ekeni týraly aıtqan.

Onyń oıynsha, aspan denesi bógde ǵalamsharlyq tehnologıanyń bir bóligi.

Qarastyrylyp otyrǵan nysan 25 jaryq jyly qashyqtyqta ornalasqan Vega baǵytynan bizdiń Kún júıesine qaraı qozǵalyp, 2017 jyldyń 6 qyrkúıeginde Kún júıesiniń orbıtalyq aýmaǵyna kirgen.

9 qyrkúıekte onyń traektorıasy kúnge jaqyndaǵan. Qyrkúıek aıynyń sońynda ol Veneranyń orbıtalyq aýmaǵynan shamamen saǵatyna 94790 km jyldamdyqpen ótip, sosyn 7 qazanda "Pegas juldyzy men odan keıingi qarańǵylyqqa qaraı jyldam qozǵaldy" dep jazady Loeb kitapta.

Nysandy alǵash ret Gavaıdaǵy Panoramalyq zertteý teleskoby jáne jedel áreket etý júıesi bar observatorıa baıqaǵan. 

Garvard ǵalymy "aspan denesiniń sıgarǵa uqsaǵan pishininiń ǵaryshta qalyptasý múmkindigi óte tómen" deıdi. Zertteýshi aspan denesiniń pishinin, jaryqty shaǵylystyrý deńgeıin, qozǵalysyn t.b ólshemderdi esepke alyp, onyń jaı aspan denesi emes, qaıta onyń ǵaryshtyq tehnologıa bolý yqtımaldyǵy joǵary ekenin alǵa tartqan.