Ǵylym jolynda baǵaly belesterdi eńserip, jahandyq ǵylymı aınalymda óziniń paıymdy oılarymen tanylǵan azamat, ósken óńiri men týǵan jerine adal perzent Vıktor Mıhaılovıch Inúshın óziniń ónegeli ómirimen, ǵylymdaǵy tabandylyǵymen, jasampazdyǵymen kópshilik qaýymǵa, stýdentterge jaqsy tanys. Onyń taǵdyryndaǵy betburystar, álemniń ǵylymı qoǵamyn dúr silkintken jetistikteri óziniń izinen ergen jas ǵalymdardy jigerlendiredi, eńbekteri talapty shákirtterge oı salady, aqyl-keńesteri jasy kishi áriptesterin danalyqqa bastaıdy.

Reseıdiń soltústik-batysynda, sol jyldardaǵy ǵylym men mádenıettiń oshaǵy sanalǵan Lenıngrad qalasyndaǵy tanymal gıdroqurylysshynyń otbasynda 1941 jyly dúnıe esigin ashqan perzentti asyl armandary kıeli Qazaqstan ólkesine jeteledi. Óskemen qalasynda balalyq shaǵynyń keremet kezeńderin ótkerip, qustardyń saıraǵan úshine, balyqtardyń sýdaǵy tirshiligine qyzyqty. Oılaı júrip, oılana júrip, aınalasynda bolyp jatqan tabıǵı prosesterdi baqylady. Bul kezeń – Vıktor Inúshınniń natýralısik kózqarastaryn qalyptastyrǵan altyn kezeń edi.

Asqaq armandaryn jetelegen jas talapker 1958-1963 jyldary S.M.Kırov atyndaǵy Qazaqtyń memlekettik ýnıversıtetiniń bıologıa fakúltetinde bilim alyp, keıinnen gıstologıa jáne sıtologıa kafedrasynda stajer-zertteýshi retinde kúrdeli ǵylym jolyna aıaq basady. Udaıy izdenis, jańalyqqa degen qumarlyq jas ǵalymdy asa kúrdeli lazerlik fotobıologıa problemasyn zertteýge baǵyttap, bıofızıka salasynyń beımálim syrlaryn ashýda zor tabysqa jetkizdi. Sońynan zerthanalyq tájirıbeniń qyry men syryna qanyǵyp, jan-jaqty bilim jınaǵan ǵalym 1972 jyly  «Gıstofızıologıcheskoe ıssledovanıe deıstvıa ızlýchenıı optıcheskıh kvantovyh generatorov ı drýgıh svetoýstanovok na organızm cheloveka ı jıvotnyh» taqyrybynda doktorlyq dısertasıany joǵarǵy dárejede qorǵady. Bıofızıka zertteý oblysyndaǵy naqty nátıjeli zertteýlerine álem ýnıversıtetteri qyzyǵýshylyq tanytyp, álemge tanylǵan ustaz 1977-1979 jyldary Polshada, Avstralıada jáne Úndi elderinde jaratylys syrlaryna qatysty leksıalar oqydy.
Vıktor Mıhaılovıch Inúshın – týǵan tabıǵatyna, ósken óńirine adal perzent. Ol elimizdegi saıası-qoǵamdyq oqıǵalardyń basynda júrip, elimizdegi ekologıalyq ahýalǵa qatysty alańdaýshylyq bildirip keledi. Bul sózimizdi onyń «Nevada-Semeı» ıadrolyq qozǵalysyna qatysqan kezeńderi aıǵaqtaıdy.

Búgingi kúnderi profesordyń ǵylymı jetekshiligimen 4 doktorlyq dısertasıa jáne 19 kandıdattyq dısertasıa qorǵaldy, ulaǵatty ustaz udaıy dıplomdyq, magıstrlik jumystarǵa jetekshilik etip keledi. Bilim berý úrdisindegi prosesterden qalys qalmaı, mektep oqýshylaryna qatysty proforıentasıalyq jumystaryn júrgizýge at salysýda. Onyń jeke qorynda baspa betinde jaryq kórgen qundy 430-dan astam ǵylymı maqalalar, 60 avtorlyq kýálikter men patentter bar.

Vıktor Mıhaılovıch Inúshınniń irgeli eńbekteri ǵylymı ortada erte kezden moıyndalyp,  A.L. Chıjevskıı medalimen jáne «Qurmet» ordenimen, 2014 jyly ýnıverstıtetimizdiń 80 jyldyq mereıtoıy qarsańynda «Ýnıversıtetke 80 jyl» saltanatty medalimen marapatttalǵan. Munymen qosa, qurmetti ustaz qazirgi tańda Bıologıa jáne bıotehnologıa salalary boıynsha halyqaralyq zertteý jumystaryn júrgizetin RF lazerlik akademıasyn akademıgi. Sonymen qatar, fakúltet ujymdy men stýdentter qaýymynyń bedeli oqytýshy, keleli keńesshi, jaqsy jan, jarqyn júrek ıesi.

Qurmetti Vıktor Mıhaılovıch Inúshın!

Sizdi 80 jasqa tolǵan mereıtoıyńyzben quttyqtaımyz! Búgingi tańda adam ómir jolynyń asqar bıigi – seksen jasqa shyǵyp otyrǵan sizdi, ǵumyryn Qazaqstan bolashaǵyna arnaǵan zıaly azamat retinde tanıdy.

Bıologıa jáne bıotehnologıa fakúltetiniń bıofızıka, bıomedısına jáne neıroǵylymdar kafedrasynyń  profesory b.ǵ.d. S.T. Tóleýhanov, dosent m.a. b.ǵ.k. G.Q. Atanbaeva