Belgili kásipker, Mıhaıl Saakashvılı basqaratyn Ýkraınadaǵy Qarapaıym sheshimder men nátıjeler keńsesine seriktes bolǵan, sońǵy jyldary belgili bir deńgeıde qoǵamdyq-saıası máselelermen shuǵyldanyp, bılikti synaǵan Marǵulan Seısembaı qoǵamdyq belsendiligin toqtatatynyn málim etti. Bul týraly ol facebook paraqshasynda habarlady.

Kásipker qoǵamdyq-saıası qyzmetpen bastapqyda barlyq aktıvterin tartyp alǵandyqtan, kópshilikke tanymaldylyqtyń arqasynda ózine belgili bir qaýipsizdikti qamtamasyz etý úshin aınalysqanyn aıtady.

– Biraq keıinirek, men saıası reformalarsyz shynaıy qaýipsizdiktiń múmkin bolmaıtyndyǵyn túsindim. Men óz synymmen Qazaqstan bıligine saıası reformalar ázirleýi úshin barynsha yqpal etýge tyrystym. Dese de, men qashan da tóńkeristerge qarsy boldym, árqashan el damýynyń evolúsıalyq jolyn jaqtadym. Soǵan baılanysty mende jyl saıyn bılikpen problemalar bolyp turdy. Alysqa barmaı-aq qoıaıyq, byltyrǵy meniń úıimniń qorshaýǵa alynǵany barlyǵyńyzdyń esterińizde bolar.  

Ótken jyldyń jazynan bastap men bizdiń bılikti synaýdy toqtatyp, belsendiligimdi Ýkraınaǵa aýystyrdym. Ózderińiz biletindeı, men Mıhaıl Saakashvılıdiń Qarapaıym sheshimder men nátıjeler keńsesinde seriktes boldym jáne Ýkraına bıligine reformalardy júzege asyrýǵa belsendi qatysyp, kómektese bastadym, – degen ol ózi úshin bir nárseni tikeleı ózgerte almaıtyn bolsa, onda bılikti synǵa alyp, ashý men ózara jekkórýshilik deńgeıin taǵy da arttyrýdyń qajeti joq ekenin túsingenin, munymen aınalysýdy is júzinde toqtatqanyn jetkizdi.

– Islam ǵalymdarynyń sózderinde: «Eger halyq óz bıleýshisiniń ádiletsizdiginen qutylǵysy kelse, onda mundaı halyq ádiletsizdik pen kúnádan ózderi bas tartýy kerek» delingen. Sondyqtan men ózimizden jáne aınalamyzdy ózgertýden bastaý kerek degen oıǵa keldim. Bul tek din, mádenıet jáne bilim arqyly múmkin bolady.

Sońǵy ýaqytta men bilim berý platformama kóp kóńil bólip, kúshim men qýatymdy sol baǵytta sarp etýdemin. Men aı saıyn derlik bıznes pen tıimdi ómirdiń ártúrli taqyryptary boıynsha 8-12 vıdeo-sabaqtaryn jarıalap otyrmyn. Kitábimdy da qatar jazýdamyn. Sondaı-aq, men aı saıyn jazylmandaryma birneshe translásıalar men zým vebınarlaryn ótkizemin. Jaqyn arada onlaın bıznes mektepti, bıznes klýb, ınvest. klýb jáne basqa da kóptegen jobalardy iske asyramyn. Sonymen qatar, men 8 áleýmettik jelidegi akkaýnttarymmen jumys istep jatyrmyn. Bıznes pen qoǵamdyq isterim taǵy bar. Osynyń bári meniń kóp ýaqytymdy alyp óz baǵytymdy ózgertýge ákelip otyr. 

Saıası qurylymǵa degen meniń ózgergen kózqarastarymdy eskere otyryp, ıslamnyń, qandaı bolmasyn, bıleýshisine qarsy shyǵýǵa tyıym salatyn talaptaryn eskere otyryp, men qoǵamdyq-saıası belsendiligimdi toqtatyp, mádenı, bilim berý jáne ekologıalyq máselelerge kóshýge bel baıladym. Men saıası qaıratker de, memlekettik qyzmetshi de bolǵym kelmeıtinin ózim úshin túsindim. Men eshqandaı saılaýǵa nemese qandaı da bir laýazymǵa aralasqym kelmegen jáne aralaspaımyn da. Men partıalar qurýǵa nemese basqa partıalarǵa kirýge nıet bildirmeımin. Men ózim úshin saıasat taqyrybyn múlde japtym. Ótti, ketti. Maǵan shekteýli jáne táýeldi saıasat qyzyq emes. Bundaı nárse maǵan jat.

Sáýir aıynan bastap Mıhaıl Saakashvılıdiń seriktesi retinde Qarapaıym sheshimder men nátıjeler keńsesindegi óz ókilettikterimdi toqtatamyn. Men bul máseleni Mıhaılmen talqyladym. Ol meniń sheshimime túsinistikpen qarap, maǵan tabys tiledi.

Bızneste, men birtindep, birneshe jyl boıy sıfrlyq, onlaın bıznes baǵyttaryna basa nazar aýdaryp sol baǵytqa kóshemin. 

Qoǵamdyq isterde men tek áleýmettik-mádenı, bilim berý, ekologıalyq jobalarmen aınalysamyn, – dep jazdy kásipker.

Marǵulan Seısembaı málimdemesiniń sońynda Qazaqstan bıligine abaqtyǵa aıdap salmaǵany úshin, Ýkraına bıligine, Kıev pen Bishkektegi Qarapaıym sheshimder keńsesindegi áriptesterine, sondaı-aq Mıhaıl Saakashvılıge alǵys bildirdi.