QR Prezıdenti Nursultan Nazarbaev resmı is-saparmen  Dýshanbe qalasyna keldi. Óziniń qazaqstandyq áriptesi Nursultan Nazarbaevty  Tájikstan Respýblıkasynyń Prezıdenti Emomalı Rahmon Kohı Mıllat Ulttar saraıynda qarsy alǵan.Bul týraly «Qamshy» portaly QazAqparatqa silteme jasaı otyryp habarlaıdy.

Elbasy Nursultan Nazarbaevtyń Tájikstandaǵy sapary barysynda ótkiziletin josparlary tómendegideı bolmaq:

1. Memleket basshysynyń sapary barysynda búgin, 14 qyrkúıekte Tájikstan Prezıdenti E. Rahmonmen shaǵyn jáne keńeıtilgen quramda kelissózder josparlanǵan.
2. Taraptar ekijaqty yntymaqtastyqtyń keń aýqymdy máselelerin talqylaıdy.
3. Budan basqa, Elbasynyń Tájikstan Respýblıkasy Joǵary Jınalys ókilderi palatasynyń tóraǵasy Sh. Zýhýrovpen kezdesýi josparlanyp otyr.

Kelissóz  qorytyndysy boıynsha birqatar qujattarǵa qol qoıý josparlanýda.

1. Atap aıtqanda: QR Mádenıet jáne sport mınıstrligi men Tájikstan Respýblıkasy Úkimetiniń janyndaǵy Jastar isteri, sport jáne týrızm komıteti arasynda dene shynyqtyrý jáne sport salasyndaǵy yntymaqtastyq týraly kelisim;
2. Qazaqstan Respýblıkasy Syrtqy ister mınıstrligi men Tájikstan Respýblıkasy Syrtqy ister mınıstrligi arasyndaǵy yntymaqtastyqtyń 2016-2017 jyldarǵa arnalǵan baǵdarlamasy;
3. Qazaqstan Respýblıkasy men Tájikstan Respýblıkasy Úkimetteri arasyndaǵy Qazaqstan Respýblıkasynyń  eńbek etip jatqan mıgranttary,   azamattary, Tájikstan Respýblıkasynda ýaqytsha jumys isteıtinderdiń eńbek qyzmeti men olardyń quqyqtaryn qorǵaý týraly, Tájikstan Respýblıkasynyń  eńbek etip jatqan mıgranttary,   azamattary, Qazaqstan Respýblıkasynda ýaqytsha jumys isteıtinderdiń eńbek qyzmeti men olardyń quqyqtaryn qorǵaý týraly 2006 jylǵy 4 mamyrdaǵy kelisimge ózgerister engizý týraly hattama; 
4. Qazaqstan Respýblıkasy Úkimeti jáne Tájikstan Respýblıkasy Úkimeti arasyndaǵy bilim salasyndaǵy yntymaqtastyq týraly 2000 jylǵy 13 maýsymdaǵy kelisimge ózgerister men tolyqtyrýlar engizý týraly hattama;
5. Qazaqstan Respýblıkasy Úkimeti men Tájikstan Respýblıkasy Úkimeti arasyndaǵy aqparatty tehnıkalyq qorǵaý salasyndaǵy yntymaqtastyq týraly kelisim;
6. Qazaqstan Respýblıkasy men Tájikstan Respýblıkasy arasyndaǵy strategıalyq áriptestik týraly shart.

Aıta keteıik, ekijaqty yntymaqtastyqty qamtıtyn 80-ge jýyq qujat bar. Qazaqstan men Tájikstan arasyndaǵy saýda aınalymy 2014 jyldyń qańtar-jeltoqsan aılarynda 700,4 mln dollardy qurady. Al 2015 jyldyń birinshi jarty jyldyǵynda 299,2 mln dollar boldy. Bul ótken jylǵy sáıkes kezeńmen salystyrǵanda 7,9 paıyzǵa tómen. 2014 jyldyń birinshi jarty jyldyǵynda 325 mln dollarǵa jetken edi.

Qazaqstan Tájikstanmen aradaǵy syrtqy saýda kólemi jaǵynan turaqty túrde  Reseıden keıingi ekinshi oryn alady.

Qazaqstan úshin yntymaqtastyqtyń basymdyqty baǵyttary - taý-ken ónerkásibi, tústi metalýrgıa, mashına qurylysy, energetıka, tamaq ónerkásibi, kólik jáne komýnıkasıa, aýyl sharýashylyǵy salalary.

Erteń, 15 qyrkúıekte QR Prezıdenti UQSHU ujymdyq qaýipsizdik Keńesiniń (UQK) memleket basshylary deńgeıindegi sesıasyna qatysady.

"Qamshy"silteıdi