QAMSHY

Dyraý qamshy, buzaý tis,

Bes qarýdyń biri edi.

Doıyrlarǵa dyraý-kúsh,

Keń dalanyń júregi.

Ońynda da, solynda,

Er jigittiń piri edi.

Jaıshylyqta qolynda,

Sándik úshin júredi,

Qaıshylyqta tiregi.

Tirliginen myń kúngi,

Belgisi edi paryqtyń.

Búlingennen búldirgi,

Almaıtuǵyn halyqtyń.

Osy qamshy esi edi,

Osy qamshy sesi edi.

Baǵy da osy bes eli,

Qaıtqan jaýdyń meseli.

Qansha myqty ańyz bar,

Paıymdasaq, pysyqtap,

El basqarǵan abyzdar,

Qamshymenen ushyqtap.

Tentektiń de urshyǵyn,

Tezge salǵan desedi.

Er jigittiń qyrsyǵyn,

Bir tartqannan kesedi.

Bı daýyna kónbegen,

Aıtylmasa jan syry.

Han aldyna kóldeneń,

Kese tastap qamshyny.

Dat suraǵan ýájdi,

Aqıqatty alǵa sap.

Osy ıgi dástúrdi,

Jaqsylyqpen jalǵasaq.

Jyny býǵan baqsylar,

Jetken kezde ýaǵy.

Qolyna alyp qamshyny,

Saıtandardy qýady.

Tasyǵanda nesibeń,

Mańdaı ter bop tamshylar.

Al búginde sesinen,

Aıyrylǵan qamshylar.

Jóndi-jónsiz shatylyp,

Mánsiz bolyp murady.

Sývenır bop satylyp,

Dúkenderde turady.

Maıǵa salsa erigen,

Qamshynyń da jany bar.

Túp atasy teriden,

Tobylǵydan saby bar.

Qasıetin qamshynyń,

Biletuǵyn el kerek.

Babasynyń jan-syryn,

Jaza almaǵan zerdelep,

Meniń daǵy jotamnan,

Tartyp jiber kermelep.

Ýa, arýaq!!!

TÁÝELSİZDİK

Qazynamdy alypty-aý tonap ábden,

Otarshyldar qursaýlap mol amalmen.

Jeltoqsan kózindegi qandy jasty,

Táýelsizdik súrtedi oramalmen.

Quzǵynnyń qanǵa toıǵan qulqyndary,

Esime alsam túrshigem sol kúndi áli.

Aq kepter bop keýdemdi jaryp ushty,

Lyqsyp turǵan tarıhtyń tolqyndary.

San qasiret jıylyp jalǵandaǵy,

San ǵasyr úmit jibi jalǵanbady.

Semeı bolyp jyrtylǵan júrekterdi,

Aral bolyp sýalǵan armandardy.

Táýelsizdik emdeıdi qanymenen,

Táýelsizdik emdeıdi janymenen.

Tamyrymda beıbit kún búrshikteri,

Tamyrlaryn tereńge jaıǵan eren.

Táýelsizdik sıpaıdy mańdaıymnan,

Tátti jyrym tógilip tańdaıymnan.

Azattyqtyń estımin ekpindi únin,

Taýlarymnan, bulaqtan, tal-qaıyńnan.

Aı-haı dalam, pań dalam, qaıran dalam,

Estımisiń daýsymdy jaırańdaǵan.

Egemen elimdi erkin qushaqtaıyn,

Armanda ketip eń –aý qaıran babam. .

ÁJE RÝHYMEN SYRLASÝ

Janym meniń gúldenedi dalada,

Seniń sóziń shyndyq eken, ras apa.

Qaıyrymy qazaqqa az qalada,

Meıirbandyq jaıly soǵyp pálsapa.

Ózińdi ańsap otyrǵanym mine, endi,

Taǵdyrdyń bul bir jazýy shyǵar-aý.

Qatyrady san saýaldar silemdi,

Júregimniń tusyndaǵy shyq anaý.

Qaıshylaıdy jas janymdy egesti oı,

Iip-ıip jumsaqtyqqa ákelgen.

Tirlik dámi sondaı tátti emes qoı,

Mámpásıdeı sen dúkennen ápergen.

İzdeıtini jaıly meken, ylǵı yq,

Bul qalanyń erejesi baǵzydan.

Qabaǵyna kórmegen esh muń jıyp,

Jylannyń da basyna aq tamyzǵan.

Qaıran ájem,

Peıili keń uqsaıtuǵyn baqshaǵa,

Tekemeti túrli kúı de syrmaǵy-án.

Ókimetiń ólshep bergen aqshaǵa,

El qatarly kúnin kórip júr balań.

Arqańyzdan túspeıtinbiz kún uzyn,

Kelmes jaqqa kete bardyń jylystap,

Arqasynan túspeıin dep ómirdiń

Men jalynan ustap aldym ýystap.

Qadap qoıyp qanqý deıtin súńgini,

Qarq-qarq kúlip syrt jaǵymnan jatty keı.

Meırimge shóldep júrmin bul kúni,

Jan qaltańnan úzilmeıtin táttideı.

JAR BASY

Qalbań-qulbań jaǵalaımyz jar basyn,

Kóńilderdiń kókke ushyryp qarǵasyn.

Tarıh atty tar soqpaqpen tasyrlap,

Ómir súırep bara jatyr arbasyn.

Syr aıtamyz sońyn dáıim útir ǵyp,

Shyndyq dese úndeı almaı qutyldyq.

Eń aıaǵy sálemiń de satýly,

Ár keýdede toı jasaıdy kúpirlik.

İzgilikti irimegen san ǵasyr,

Ókshesimen ezgileıdi maýbas ul.

Soǵan qarap qol soǵamyz endi biz,

«Oıpyr-aı dep sendeı asyl bar ma bul».

İshte - shemen, aıtamyzda hatqa syr,

Baq qusy ma ol da shet el jaqta júr.

İnińiz de izetti emes esepshil,

Aǵańyz da jaılaý emes jap-jasyl.

 

JAN QÝATYM

Qaýyzyn ashyp kúnniń,

Ózińe ǵashyq qyldyń.

Aı bolyp kóńilimde,

Nuryńdy shashyp turdyń.

Órmelep órge kelem,

Shubatyp órmek óleń.

Sanamdy selt etkizdiń,

Jeligip kórmegen em.

Ózińsiń sirá, aq qusym,

Toqtatyp ýaqyt kúshin.

Alqynyp jetken jańa,

Keshikken baqytpysyń?.

Lyp etip sala qoıyp,

Uıattyń tez ilgegin.

Aǵyttyń túımelerin,

Buıyqqan sezimderdiń.

Turǵasyn shyn qasynda,

Dátimiz synbasyn ba.

Ózendeı órekpidim,

Júrektiń jylǵasynda.

Tutqyny jasadyń da,

Boıkúıez qamyqty oıdyń.

Janymnyń qýaty ediń,

Úzilip qalyp qoıdyń.

OTTAI JANYP...

Sen de bara jatyrsyń ottaı janyp,

Men de bara jatyrmyn ottaı janyp.

Ekeýmizde lezde otqa aınalyp,

Qazanynda qyzyqtyń kóp qaınadyq.

Sodan keıin kúı keshtik shoqtaı-ǵarip.

Al, biraq ta órtengir sezimderim,

Júr áli kóbelekteı otty aınalyp.

On ekide bir gúliń jańa ashylyp,

Mahabbattyń mazmunyn jańasha uǵyp.

Erkeleısiń, eljirep meıirmenen,

Sábıdeı tili júrgen jańa shyǵyp.

Ottyǵyn jarq etkizdi qarasha úmit,

Kóz aldymda bir ushqyn bara jatty.

Myń jarqyldyń ishinen dara shyǵyp,

Janymdy jaıyp salyp alasha ǵyp,

Qaraýyldaı qorımyn aq betińdi,

Almasyn dep albaty ara shaǵyp,

Men de bir bal jınaǵan bal aramyn,

Albyrt shaqtyń alqabyn araladym.

Ózińe ákep usynam bal oramyn.

Sen meniń mańdaıymnan sıpap turyp,

Julym-julym júrekti jaraladyń,

Qolyń bulǵap bizderge bara ma kún?..

Ertesine sen maǵan qaramadyń...

NUR JETEKTEGEN QYZ

Otanyńnyń bolsa-daǵy jeri keń,

Tas qalada tasyrqaǵan elik eń.

Noqaı bermes nanymymdy noqtalap,

Naýryzda nur jetektep kelip eń.

Sol sátterde Qarataldaı tasyp em,

Dáıim alshy túsetuǵyn asyq em.

Tik ushaqtaı kókke ilinip turatyn,

Bolǵan emes mártebemniń bási kem.

Jel-jeliktiń ótkelegi belgili,

Biraq ondaı deı almaımyn men muny.

Kógershinder súıinshilep ketti ushyp,

Jer betine maqsatydaı keń de uly.

Bálkim ony bylaıǵy jurt sezbegen,

Jáne de ony jetkize alman sózbenen.

Aq bulttardan úzip alyp usynǵan,

Qolynda júr izgilerdiń kezdemem.

Mańdaıymnan maıda samal júr esip,

Balýandaımyn jaýdy jeńgen kúresip.

Kóńilimniń kóktegeni belgili,

Naýryzben sen kelgende ilesip.

KÚN QYZY

Sıpaty -kún, shashy -kún, minezi - kún,

Myń qasıet basynda bir óziniń.

Seniń basqan izińdi, óziń túgil,

Qaraýyldaı kúzetip júrem izgim.

Kúnder ótti bir, eki, úsh. . . sanamastan,

Jalynyma órtenip janady aspan.

Senbeısiń be jaryp kór júregimdi,

Júregimde móriń bar jańa basqan.

Qınasań da janymdy qanshama myń,

Buǵaýyńa tózdim men sharshamadym.

Bul da bir synaǵy ǵoı syny myǵym,

Ejelden kele jatqan hanshalardyń.

Tańsárideı tunyǵym, raýanym,

Sezemisiń janymnyń bul aýanyn.

Qalaýyńa berdim men barlyǵyn da,

Mine mynaý ımanym, mynaý arym.

Erǵazy Manapuly