SpaceX kompanıasynyń bas atqarýshy dırektory Ilon Mask "X syılyq qorynyń" negizin qalaýshy Pıter Dıamandıske suhbat berdi.

Suhbatta Mask 2026 jylǵa deıin  adamdardy Marsqa  jetkizýge úmittenetinin aıtty. Al, NASA ǵaryshkerlerdi Qyzyl ǵalamsharǵa Masktan jeti jyl keıin, 2033 jyly jibermek.

Jalańaıaq otyryp, suhbat bergen Mask "Marsqa barý Shakltonnyń Antarktıdaǵa baratyn jarnamasy sıaqty. Sizder bul mısıanyń qaýipti ekenin bilesizder, bul qıyn jáne uzaq sapar. Siz tiri oralmaýyńyz da yqtımal, biraq bul keremet jáne tańǵajaıyp oqıǵa bolady. Ia, shyndyǵyn aıtsaq, bastapqy kezde adamdar ólýi múmkin. Óte qıyn mısıa" dedi.

NASA Artemıda baǵdarlamasynyń aıasynda alǵashqy ǵaryshkerlerdi Marsqa 2033 jylǵa qaraı jibermek jáne 2024 jyly Aıǵa ǵaryshkerler jiberýdi josparlap otyr. Olardyń arasynda alǵashqy áıel ǵaryshkerdiń Aıǵa aıaq basatyny habarlandy.

Al, Mask 2026 jylǵa deıin adamdardy Qyzyl ǵalamsharǵa qondyrý maqsatyna jetemin dep úmittenenedi. Ol tehnıkalyq kedergiler problemasyn sheshýge ýaqyt jetkilikti ekenin aıtty.

Masktyń aıtýynsha, Marsqa juldyzkeme arqyly sapar shegý úshin 2026 jylǵa deıin birqatar tehnologıalyq jetistikter qajet.

Qajetti tehnologıalyq jetistikke qaıta paıdalanýǵa bolatyn juldyzkemeni jasaý jáne orbıtada janar maı quıý problemalary kiredi. Orbıtada jetkilikti janarmaı toltyrylǵan soń, juldyzkeme Marsqa deıingi alty aılyq saparǵa jiberilmek.

Birqatar sátti synaq reısterinen keıin Mask 2024 jyly Marsqa ekıpajsyz juldyzkeme jiberýdi josparlap otyr jáne 2 jyldan keıin ǵaryshkerlerdi jibermek.

"Jerdiń tórt jarym mıllıard jyldyq tarıhynda alǵash ret tirshilikti Jershardan tys (aýmaqqa) keńeıtý jáne tirshilikti kóp ǵalamsharly etý múmkin bolmaq" dedi ol.

"Adamzat tirshiliktiń ókili sanalady. Biz Jerde apat bolǵan kúnniń ózinde, ol tehnogendik nemese tabıǵı apat bolsa da, Jerdegi jaratylystardyń jalǵasýyn qamtamasyz etýge mindettimiz. Eger siz qazba qaldyqtarǵa nazar aýdarsańyz, Jersharda kóptegen jappaı joıylý bolǵan" deıdi Mask. 

"Birinshi qaısysy bolýy múmkin? Marstaǵy ózin-ózi qamtamasyz etetin qala nemese Úshinshi dúnıejúzilik soǵys?" degen ol Qyzyl ǵalamsharda tezirek táýelsiz qala salýdyń mańyzy joǵary ekenin jetkizdi. 

Ol janarmaı zaýyty, kún energıasy, tamaq óndirisi, temir rýdasyn óńdeý zaýyty Marstaǵy qalany ózin-ózi qamtamasyz etýge qajet "ónerkásiptiń negizi" ekein aıtty.

Aıta keteıik, osy aıdyń basynda NASA ǵaryshkerlerdi Aıǵa aparatyn ǵarysh apparatyn jasaý úshin Ilon Masktyń SpaceX kompanıasyn tańdady.