Qazaqstannyń burynǵy qarjy mınıstri Aleksandr Basýla 96 jasqa qaraǵan shaǵynda dúnıeden ótti. Bul týraly qarjy mınıstrliginiń resmı saıty habarlady.

"Ol uzaq jyldar elimizdiń qarjy salasyn basqarǵan. Qarjy mınıstrliginiń ujymy Basýla Aleksandr Efımovıchtiń otbasyna qaıǵyryp kóńil aıtady" delingen habarlamada.

Sondaı-aq Elbasy Nursultan Nazarbaev Aleksandr Efımovıchtiń qazasyna baılanysty kóńil aıtý jedelhatyn joldady.

"Ol esepshiden Qazaq KSR-nyń qarjy mınıstrine deıingi eńbek jolynda jemisti qyzmet atqaryp, osy salanyń damýyna súbeli úles qosty. Men ony respýblıkanyń mınıstrler keńesinde birge jumys istegen kezimizden jaqsy bilýshi edim.

Aleksandr Efımovıch joǵary kásibı biliktiligimen, berik ustanymdarymen, adamı qasıetterimen erekshelenetin. Aleksandr Basýlanyń jarqyn beınesi ony biletin adamdardyń júreginde árdaıym saqtalady" delingen jedelhatta.