Almaty. Qamshy portaly - «Abaılańyz, balalar!» respýblıkalyq jedel-profılaktıkalyq is-sharasy aıasynda Shymkent qalasynyń tártip saqshylary «Birinshi synypqa baratyndardy jaıaý júrginshiler qataryna qosý» aksıasyn uıymdastyrdy. Sharanyń negizgi maqsaty – jasóspirimderdiń qatysýymen oryn alatyn jol-kólik oqıǵalarynyń aldyn alý, oqýshylardy jol júrý qaýipsizdigin saqtaýǵa daǵdylandyrý, sondaı-aq, balalardyń jaraqat alýy máselelerine júrgizýshilerdiń, ata-analar men muǵalimderdiń nazaryn aýdarý.

Qaladaǵy №1 A.Pýshkın atyndaǵy mektep-gımnazıasynyń birinshi synyp oqýshylarynyń qatysýymen ótken aksıaǵa tártip saqshylary «Aqbota» oıynshyqtar teatryn shaqyrdy. Ártúrli boıaýlarmen bezendirilgen qoıylym balalardy kóshede ózin qalaı ustaý kerektigine jáne óz betinshe jol qozǵalysy qatysýshysy bolýǵa úıretip, jol qozǵalysy erejeleriniń mańyzdylyǵyn oqýshylarǵa suraq-jaýap saıystaryn uıymdastyrý, jumbaqtar qoıý arqyly túsindirdi. İs-sharaǵa 500-ge jýyq birinshi synyp oqýshylary qatysty.
Jalpy, sala mamandarynyń bergen málimetinshe, aǵymdaǵy jyldyń 8 aıynda ońtústik óńirinde jaıaý júrginshi balalardyń qatysýymen 277 jol-kólik oqıǵasy oryn alyp, 23 bala qaıtys bolǵan. 263 bala zardap shekken.

Al Mıllıonǵa jýyq turǵyny bar Shymkentte bilim kúni qarsańynda jeti bilim berý nysanynyń qurylysy aıaqtalyp, el ıgiligine tapsyrylǵan bolatyn. Búginde shahardaǵy 126 mektepte 148 myńǵa jýyq oqýshy oqıdy. Bul oblystaǵy mektepterde bilim alatyn 602 myń oqýshynyń 25 paıyzyna jýyǵy Shymkent qalasyndaǵy mektepterde bilim alady degendi bildiredi. Bıyl Ońtústik Qazaqstanda mektep tabaldyryǵyn alǵash attaǵan 70448 oqýshynyń 21 myńnan astamy Shymkenttegi mektepterge qabyldandy. 2015-2016 oqý jylynda 1-synyp oqýshylarynyń 30 paıyzy oblys ortalyǵyndaǵy bilim oshaqtarynda dáris almaq. Mektepke deıingi uıymdarda balalardy qamtý kórsetkishi 77 paıyzǵa jetti. Shaharymyzda jyl sońyna deıin jańa alty balabaqshanyń qurylysy aıaqtalmaq. Elimizdegi iri qalalardyń sanatyna engen Shymkent qalasynda búginde 296 mektepke deıingi uıym belsendi jumys jasaýda.

Derekkózi: shymkent.gov.kz