Almaty. Qamshy portaly - Balalardy mektepke deıingi tárbıe men oqytý boıynsha Elbasy 2020 jyly balalardy 100 paıyzǵa qamtý jóninde tapsyrma bergen bolatyn. Osy tapsyrma Túlkibas aýdanynda oryndalyp otyr.

Óıtkeni aýdanda «Balapan» baǵdarlamasy aıasynda 3-6 jas aralyǵyndaǵy balalardy qamtý ótken jyly 76,6 paıyzdy qurasa, bıylǵy jyly bul kórsetkish 93 paıyzdy qurap otyr. Árıne bul qýantarlyq jaǵdaı. Áleýmettik máseleler oń sheshimin tapqan aýdandaǵy shalǵaı ornalasqan eldi-mekenderde balabaqshalar ashylyp, jańa bilim oshaqtary balalarǵa esigin aıqara ashpaq. 

Sondaı óńirdiń biri Rysqulov aýyldyq okrýgine qarasty Jańatalap aýylynda 150 oryndyq mekteptiń qurylysy jyl sońyna deıin paıdalanýǵa berilý josparlansa, endi mine aýylda 100 oryndyq «Qaraqat» balabaqshasy el ıgiligine berilip otyr. Áleýmettik nysan «Balapan» baǵdarlamasy boıynsha memleket pen jekemenshik áriptestigi negizinde iske qosylyp otyr. Atalǵan balabaqshaǵa Jańatalap, Jylandy, Qarabastaý aýylynyń búldirshinderi qamtylca, 22 azamat jumysqa ornalasty. 

Osy kúni Jaskeshý aýylynda jańa 100 oryndyq balabaqsha paıdalanýǵa berildi. 5500-ge jýyq halqy bar Jaskeshý aýylynda bul 3-shi balabaqsha bolyp otyr. Halyq sany jyl saıyn ósip kele jatqan aýylda jańa balabaqshaǵa 25 adam turaqty jumysqa tartylyp otyr. Atalǵan balabaqshalarda oıyn alańdary, jatyn bólmeler, oqý synyptary, beıneleý óneri zaldary zamanaýı talaptarǵa saı jabdyqtalǵan. Jańa balabaqshalardyń ashylýynda aýdan ákimi Q.Abdýalıev sóz sóılep, búgingi kúnge deıin árbir aýyldyń ortalyq aýyldaryna erekshe kóńil bólinip kelse, endi shalǵaı ornalasqan eldi mekenderdiń ishki kósheleri jóndelip, mektepter men balabaqshalar, sport alańshalary jáne saıabaqtar ashylyp otyrǵandyǵyn aıtty. Sondaı-aq, jyl sońyna deıin aýdanda taǵy 3 balabaqsha ashylý josparlanýda, dep habarlaıdy OQO ákiminiń baspasóz qyzmetinen. 

Derekkózi: QazAqparat