Almaty. Qamshy portaly - Búgin Munaıly aýdanynyń Dáýlet eldimekeninde reti boıynsha 10-nshy memlekettik balabaqshanyń ashylý saltanaty ótti.

№ 10 «Aqbota» balabaqshasy 280 orynǵa eseptelgen. Ekiqabatty ǵımarat ózin-ózi taný, orys tili men aǵylshyn tilin úırený jáne vokal synyptarynan turady. Búldirshinderdi asqanada arnaıy balalar máziri boıynsha tamaqtandyrady. Jańa balabaqshada medısınalyq qyzmetkerge de arnalǵan bólme qarastyrylǵan. Mekeme 65 qyzmetkerden turady, onyń ishinde 24-i tárbıeshiler.

Saltanatty lenta qıý rásimine aýyl aqsaqaldar keńesiniń tóraǵasy Nasrýlla Sársenǵalıev pen Mańǵystaý oblysynyń ákimi Alık Aıdarbaev qatysty.

- 2007 jyly QR Prezıdenti Nursultan Nazarbaevtyń Jarlyǵymen, táýelsiz Qazaqstannyń tarıhynda tuńǵysh ret, bir ǵana oblysta jańa ákimshilik-aýmaqtyq birlik – Munaıly aýdany quryldy. Bul sheshim qala mańyndaǵy eldi mekenderdiń áleýmettik-ekonomıkalyq máselelerin sheshýge múmkindik berdi. Aýdan turǵyndarynyń áleýetin arttyrýǵa baǵyttalǵan jumystar áli de júrgizilýde, áleýmettik nysandar salynyp, eldi mekenderdiń ınfraqurylymy damýda. Qazirgi tańda Munaıly aýdanynda 9 memlekettik jáne 15 jeke menshik mektepke deıingi balalar ǵımaraty, 4 shaǵyn ortalyqtar paıdalanymǵa berildi. 3 pen 6 jas aralyǵyndaǵy jas turǵyndardyń 60%-y mektepke deıingi tárbıe jáne oqýmen qamtamasyz etilgen, - dedi Mańǵystaý oblysynyń ákimi Alık Aıdarbaev.

Jaqyn arada Atameken eldimekenindegi 280 oryndy balabaqsha men 1200 oryndy mekteptiń qurylystary aıaqtalady. Mańǵystaý-5 turǵyn alaby men Atameken eldimekeninde árqaısysy 100 oryndy jeke menshik balabaqshalardyń ashylýy josparlanýda. Atalǵan ǵımarattardyń qurylystary ótken jyldyń maýsym aıynda bastalǵan bolatyn.

Mańǵystaý oblysy ákiminiń baspasóz qyzmeti