Qazaqstan musylmandary dinı basqarmasynyń Qajylyq bólimi Saýd Arabıasy Koróldiginiń Densaýlyq saqtaý mınıstrligi 2021 jylǵy qajylyq maýsymyna daıyndyq sheńberindegi arnaıy talaptardy jarıalaǵanyn habarlady.
Oǵan saı, "Qajylyq-2021" maýsymyndaǵy qajylar sany 60 myń adamǵa belgilengen. Qajylyq jasaýǵa 18-60 jastar aralyǵyndaǵy azamattar ótinish bere alady.
Qajylyqqa barǵysy keletinderden Saýd Arabıasynda resmı bekitilgen vaksına túrleriniń (Pfizer-BioNTech, AstraZeneca, Johnson&Johnson jáne Moderna) eki dozasyn qabyldaý talap etiledi. Ekinshi dozany Koróldikke barýdan 14 táýlik buryn saldyrý mindetti. Shet elderden kelgen azamattarǵa qajylyq qulshylyǵyna qatysy joq ózge aımaqtarǵa barýyna tyıym salynady.
"Sonymen qatar, ár qajy joǵaryda atalǵan vaksınalardyń birin saldyrǵany týraly óz eliniń quzyretti organdarynan anyqtama alýy jáne ony Saýd Arabıasynyń shet memleketterdegi elshilikterinde zańdastyrýy kerek. Buǵan qosymsha ár qajydan Koróldikke kelgen kezde 72 saǵatqa jaramdy teris nátıjeli PTR-test anyqtamasyn da kórsetý talap etiledi.
Qajylar Mekke aımaǵynda bir orynnan ekinshi orynǵa kóshken ýaqytta barlyq densaýlyq saqtaý sharalaryn qatań saqtaýy tıis. Sondaı-aq bekitilgen erejelerge tolyq baǵyný qajet.
Alaıda "Qajylyq-2021" maýsymynda qandaı memleketten qansha adam shaqyrylatyny jaıly jańalyqty Saýdıa bıligi ázirge taratpaı otyr. Qajylyq maýsymyna qatysty jańa aqparattar men qosymsha talaptar bolǵan jaǵdaıda qosymsha habarlanady" delingen aqparattyq habarlamada.
Bıyl "Qajylyq-2021" 17 shildede bastalady.
2021 jylǵy 26 mamyrdaǵy málimet boıynsha Qazaqstanda 2 035 781 adam vaksına saldyrǵan. Olardyń deni negizinen reseılik "Spýtnık V" jáne otandyq QazVac vaksınalaryn saldyrýda.
