Prezıdent Qasym-Jomart Toqaev sybaılas jemqorlyqqa qarsy is-qımyl agenttiginiń tóraǵasy Marat Ahmetjanovty qabyldady. Bul týraly Aqorda saıty habarlady.

Prezıdent sybaılas jemqorlyqqa qarsy is-qımyl agenttiginiń tóraǵasyna memlekettik organdar men basqa da uıymdardyń sybaılas jemqorlyqqa qarsy is-qımyldaryn úılestirý jónindegi jumystardy kúsheıtýdi tapsyrǵan. Bul rette Qasym-Jomart Toqaev ózderiniń qaramaǵyndaǵy qurylymdarda sybaılas jemqorlyq kórinisteriniń aldyn alý úshin tıisti sharalar qabyldamaıtyn basshylarǵa yqpal etýdiń pármendi tetikterin zańnamalyq turǵydan bekitý kerek ekenin atap ótti. 

"Qasym-Jomart Toqaevtyń tapsyrmasy boıynsha sybaılas jemqorlyqqa qarsy is-qımyl turǵysynan mınıstrler men ákimder qyzmetiniń tıimdiligin baǵalaýdyń naqty talaptary ázirlenedi. Bul máselede enjarlyq tanytqan basshylar jaýapqa tartylady" delingen resmı saıt habarlamasynda.

Memleket basshysy búdjet qarjysyn jumsaýdyń ashyqtyǵyn odan ári arttyrýdyń mańyzdylyǵyn atap ótip, sybaılastyqtyń aldyn alý sharalaryna basymdyq berý týraly aıtty.

Sondaı-aq qylmystyq jolmen alynǵan qarajat pen aktıvterdi izdestirýge jáne qaıtarýǵa basymdyq bere otyryp, sybaılas jemqorlyqqa jatatyn qylmystar jasaǵany úshin jazanyń bultartpas qaǵıdatyn múltiksiz saqtaý qajet ekenine nazar aýdardy.