"Aq jol" demokratıalyq partıasy ár bala dúnıege kelgen saıyn ıpotekany 25 % jeńildetýdi suraıdy. Vıse-mınıstr Roman Sklárdyń atyna fraksıanyń tıisti depýtattyq saýalyn Erlik Ómirǵalı baıandady.

Depýtattyń aıtýynsha, 2020-2025 jyldarǵa arnalǵan "Nurly jer" turǵyn úı-kommýnaldyq damý baǵdarlamasyndaǵy jeńiltetilgen sharttar ákimdikterde kezekte turǵandarǵa ǵana qoldanylady. Al kezekke tek múgedekter, kóp balaly otbasylar, ardagerler nemese jetimder sekildi belgili bir sanattaǵy azamattar ǵana qoıylatynyn atap ótken ol "otbasyn jańadan qurǵan, qol-aıaǵy saý, biraq áli óz uıasyna qarajat jınap úlgermegen jastar ne isteýi kerek? Olar qashan balaly bolady? Kóp balaly otbasylar birden paıda bolmaıdy ǵoı" dep jastardyń baspanaǵa qoljetimdiligin arttyrý máselesine nazar aýdardy.

– Olar páterge aqsha jınap bolǵanda jastary 40-tan asyp qalady, bul jasta áıelderdiń sábıli bolý qabileti de tómendeıdi, dárigerlerdiń aıtýynsha, erler men áıelderdiń úshten biri 40 jastan keıin jáne odan da erterek bedeýlikke ushyraıdy. Qazirgi jaǵdaıda, memlekettiń nemese dáýletti ata-ananyń qoldaýynsyz jas otbasylar 40 jasqa deıin óz kúshimen baspana ala almaıdy. Osyǵan baılanysty, "Aq jol" demokratıalyq partıasy jas otbasylar úshin ár bala týǵan kezde 25% mólsherinde ıpotekalyq kredıtter boıynsha paıyzdyq mólsherlemelerdi sýbsıdıalaýdy engizý týraly 2013 jylda aıtylǵan usynysyna qaıta oralady. Paıyzdyq mólsherlemelerdi sýbsıdıalaý bıznesti kredıtteý kezinde memlekettik jáne jeke múddelerdi ushtastyrý quraly retinde ózin jaqsy jaǵynan kórsetti. Bul tabysty tájirıbeni áleýmettik baǵdarlamalarǵa da taratý kerek dep sanaımyz. Sonda úlken otbasy 10 jyl kezekti kútpeı, 4-shi bala týǵan kezde birden paıyzsyz baspanaly bolady, al eki balasy bar otbasy mólsherlemeniń jartysyn ǵana tóleıdi. Bul rette, memleket tóleıtin paıyzdardy eseptemeı-aq otbasy úshin qaryzdyń negizgi somasyn birtindep óteýdi qaldyrýǵa bolady. Bul shara jas otbasylardy birden balaly bolýǵa yntalandyrýǵa múmkindik beredi, al ekinshi deńgeıdegi bankter ıpotekany belsendi túrde kredıtteýge múmkindik alady, – deıdi depýtat.

Májilistegi "Aq jol" fraksıasynyń músheleri usynylyp otyrǵan tásil turǵyn úıge bola ajyrasý jaǵdaılary órship bara jatqan sátte otbasy ınstıtýtyn nyǵaıtady dep sanaıdy.