«Astana EKSPO-2017» kompanıasyndaǵy jemqorlyq isi boıynsha sottan burynǵy tekserý jumystary aıaqtaldy. Bul týraly QR Memlekettik qyzmet jáne jemqorlyqqa qarsy kúres agenttiginiń tóraǵasy Qaırat Qojamjarov Parlamenttiń tómenge palatasy ókilderimen kezdesýinde málimdegen.  Bul týraly «Qamshy» portaly informburo.kz saıtyna silteme jasaı otyryp habarlaıdy.

«Astana EKSPO-2017» ulttyq kompanıasyndaǵy jemqorlyq isi boıynsha kúdiktilerge qatysty tergeý jumystary aıaqtalǵan. Qazir atalmysh is boıynsha aıyptalýshylardy qylmystyq is materıaldarymen tanystyrý prosedýralary júrgizilýde. Agenttik tóraǵasy Qaırat Qojamjarovtyń aıtýynsha, dál «EKSPO-2017» isi boıynsha 24 adam jaýapqa tartylýy múmkin.

Jemqorlyqpen kúres agenttiginiń tóraǵasy aıtqan aqparattarǵa súıensek, «Astana EKSPO-2017» ulttyq kompanıasyndaǵy eks-qyzmetkerlerge «memleketten bólingen  qarajattan 10 mıllıard teńgeni talan-tarajyǵa túsirgen» degen kúdik keltirilýde.

Qaırat Qojamjarov, Memlekettik qyzmet jáne jemqorlyqpen kúres agenttiginiń tóraǵasy:

-Qoldy bolǵan qarjynyń jalpy somasy 10 mıllıard 200 mıllıon teńgeni qurap otyr. Onyń ishinde jeke Ermegıaev myrzanyń ózi 4 mıllıard 200 mıllıondy zańsyz ıemdengendigi dáleldendi. Sondaı-aq, zańsyz jolmen qoldy bolǵan aqshaǵa qonaqúı jáne avto kólik satyp alynǵandyǵy da anyqtaldy. Bul «EKSPO»-ǵa bólingen qarajatqa satyp alynǵan aktıvterden ózgesi de jeterlik. Turǵynúı, avtokólik, qonaqúı keshenderi t.b.

Al, 13-maýsymda «Astana EKSPO-2017» Ulttyq kompanıasy AQ eks-basshysy Talǵat Ermegıaev pen onyń kómekshileri asa iri kólemde para aldy jáne búdjet qarjysyn talan-tarajǵa saldy degen aıyp boıynsha úıqamaqqa alanǵan bolatyn.

Sondaı-aq, «Astana EKSPO-2017» qurylys departamentiniń eks-basshysy Qajymurat Úsenov te Ermegıaevpen birleskeni úshin úıqamaqqa alynǵan.

Keıinirek, quqyq qorǵaý organdary mamandary «EKSPO isiniń» úshinshi fıgýranty retinde kompanıanyń atqarýshy dırektorlarynyń biri Sýlambek Barkınhoevty da qamaýǵa alǵandyǵy týraly osyǵan deıin jazǵan bolatynbyz.

Ataýy ǵana ózgergen, biraq jemqorlyqpen kúresetin Qaırat  Qojamjarov myrza dál osydan bir jyl buryn iri tutqyndaýlar Ábdishevpen aıaqtalmaıtyny týraly emeýrin tanytqany esińizde bolar. Sol sózi rasqa aınalýda búginde.

Kezinde atynan at úrketin qazir tarap ketken Qarjy polısıasyn basqarǵan Qaırat Qojamjarov jemqorlarmen bel sheshe kúresýde. Qaýipsizdik keńesiniń hatshylyǵynan keıin ataýy ǵana ózgergen Agenttikke ekinshi ret basshy bolyp taǵaıyndalǵan Qojamjarovtyń qarqyny qatty. Májiliske kelgen ol búdjet aqshasyn urlap, para alýǵa dánikken áriptesterimen qalaı kúresetinin túsindirgeni de esimizde. Aıtpaqshy aıtyp edi ǵoı, Qojamjarov myrza, «Jańa bastyq kelse, ol óziniń komandasyn birge alyp keledi.  Olar muny tek bir ǵana sebeppen isteıdi. Qylmys jasaý úshin jáne sol qylmysyn áshkerelemeý úshin. Basqalaı bolýy múmkin emes!»,-dep.  Qalaı aıtqan, á?

Dese de, qazaqstandyqtardyń arasynda «Ermegıaevke qastandyq jasalǵan», «Ony ádeıi arandatyp jiberdi», «Ermegıaev bólispeı qoıǵan ǵoı» degen sybystar da joq emes. Sonda bıliktiń kózine «jemqor» bolyp, al halyqtyń kózinde «altyn kórip joldan taıǵan perishte» obrazyndaǵy Ermegıaev shynymen paraqor ma? Álde... Jemqorlyqpen kúres agenttigi basshysy Qaırat Qojamjarov myrzanyń ózi aıtty, « barlyǵy dáleldendi» dep. «Aqsaqal bılik» qalyptastyrǵan «komandalyq júıege» ashyq qarsy shyǵa alatyn Qojamjarovtyń sózinen keıin alyp-qosarymyz bolmas. Ermegıaev komandasynyń qylmystyq isine qatysty tergeý nátıjeleri belgili boldy. Endi halyq aýzynda aıtylyp júrgendeı «podstava» qurbany bolǵan  Talǵat Ermegıaev qandaı ýáj aıtady degen suraq qaldy. Osy tusta eskere ketkenimiz taǵy jón bolar. Qutylǵandar men tutylǵandar týraly qıssanyń birinshi bólimi osylaı aıaqtalýǵa jaqyn. Ahmetov, Ábdishev, Ermegıaev  – qaryshtap damyǵysy keletin Qazaqstannyń korrýpsıa deıtin «keselin» juqtyrǵandar ma?

Elbasyna sert berip, senimin aqtamaǵandar týraly osynyń aldynda da jazǵan bolatynbyz.

Eske túsire keteıikshi, Ahmetov ustalǵanda «eshteńe aıtpaımyn. Kináli bolsam qamańdar» dedi.  Ábdishev myrza tutylǵanda «korrýpsıany eshkim jeńgen emes» degen. Erlan Aryn she? «Elbasynan keshirim suraımyn» dep edi ǵoı. Endi Ermegıaev ne deıdi eken?

Nurgeldi Ábdiǵanıuly