9 óńirde jalpy kólemi jylyna 3,6 mlrd. m3 bolatyn 39 jańa sý qoımasyn salý josparlanǵan. Bıyl Túrkistan oblysyndaǵy Keńsaı-Qosqorǵan sý qoımasynyń qurylysy aıaqtalady. Bul týraly Ekologıa, geologıa jáne tabıǵı resýrstar mınıstri Maǵzum Myrzaǵalıev halyq aldyndaǵy eseptik kezdesýinde aıtty.
– Sý qoımalaryn salý 70 eldi meken (137 myń adam) úshin sý tasqyny qaýpin azaıtýǵa, 394 myń ga jańa sýarmaly jerlerdi aınalymǵa engizýge, aýyl sharýashylyǵynda 129 myńnan astam jumys ornyn qurýǵa, transshekaralyq ózenderdiń sý kólemine táýeldilikti alyp tastaýǵa múmkindik beredi. Bul Qyrǵyzstanǵa táýeldilikti 30%-ǵa deıin, Ózbekstanǵa 25%-ǵa deıin, Reseıge 15%-ǵa deıin táýeldilikti tómendetedi, – dedi M.Myrzaǵalıev.
Onyń aıtýynsha, byltyr Túrkistan oblysy Maqtaaral aýdanynda uzyndyǵy 12 km "K-19" magıstraldy kanalyn sıfrlandyrý boıynsha pılottyq joba iske asyrylǵan.
– Kanaldy sıfrlandyrýdyń arqasynda sý sýarý normalardan qyryq bes (45%) paıyzǵa kóp jumsalatyny anyqtaldy. Bıyl 16 arna sıfrlandyrylady. Taıaýdaǵy bes jyl ishinde uzyndyǵy 2,8 myń km-den asatyn 119 arnany sıfrlandyrý josparda bar, – dedi ol.
