QR premer-mınıstri orynbasary Darıǵa Nazarbaeva Tatarstan Respýblıkasy prezıdenti Rýstam Mınnıhanovty saltanatty ulyqtaý rásimine qatysý úshin Qazan qalasyna barǵan saparynda Qazaqstan Respýblıkasynyń tuńǵysh prezıdenti Nursultan Nazarbaev atyndaǵy kósheni aralady. Bul týraly «Qamshy» portaly Tatarstan Respýblıkasy baspasóz qyzmetine silteme jasaı otyryp habarlaıdy.
Tatarstan Respýblıkasyndaǵy qazaq ulttyq-mádenı avtonomıasy belsendileriniń bastamasy boıynsha Qazan qalasyndaǵy iri kóshelerdiń birine Qazaqstannyń tuńǵysh prezıdentiniń esimi berilgen bolatyn.
«Qazaqstan prezıdentiniń esimimen atalatyn kóshe shynymen de úlken. Qalanyń ortalyǵynda ornalasqan jáne 10 qatar arqyly avtokólikter qozǵalys jasaı alady. Bul kósheniń boıynda Halyqtar dostyǵy úıi, Qazan qalalyq botanıkalyq baqsha, Tatarstan respýblıkalyq fılarmonıasy, Qazan qalalyq energetıka koleji t.b. ornalasqan»,- deıdi Tatarstandaǵy qazaqtar qaýymdastyǵynyń ókili Saǵıt Jaqsybaev.
Tatarstandaǵy etnıkalyq qazaqtar munymen shektelmek emes. Qazaq mádenıetine eńbegi sińgen qaıratkerlerdiń eskertkishterin qoıý josparlanyp otyr eken.
Al, Tatarstan prezıdenti Rýstam Mınnıhanovty ulyqtaý rásimine Qazaqstan prezıdentiniń quttyqtaý hatyn ala kelgen premer-mınıstridiń orynabsary Darıǵa Nazarbaev ákesiniń atymen atalatyn kósheni aralap, ondaǵy qazaq mádenı ortalyǵymen tanysqan.
Al, prezıdentti ulyqtaý rásiminen keıin Darıǵa Nursultanqyzy Tatarstan prezıdentimen eki jaqty kelissózder júrgizgen. Kelissózder barysynda eki el arasyndaǵy saýda-ekonomıkalyq qatynastar jaıy sóz bolǵan. Darıǵa Nursultanqyzy qarqyndy damyp kele jatqan Tatarstan Respýblıkasynyń qazirgi áleýetin aıta kele, Qazaqstan osyndaı memleketpen qarym-qatynasty jaqsartýdy kózdeıtinin jetkizgen.
Rýstam Mınnıhanov óz kezeginde Tatarstan Respýblıkasy RF quramyndaǵy eń iri ekonomıkalyq ortalyqtardyń biri ekenin atap ótken. «Búginde Qazaqstan men Tatarstan arasyndaǵy saýda aınalymy 1 mıllıard dollardy qurap otyr. Osy qarqynymyzdan taımaıtyn bolsaq, budan da jaqsy nátıjelerge qol jetkizemiz dep senemin»,-dedi Tatarstan prezıdenti. Sóz sońynda Rýstam Mınnıhanov Qazaqstan prezıdenti Nursultan Nazarbaevty óz eline qonaq bolyp qaıtýǵa shaqyrǵan.
Nurzat Toǵjan
