Aqtaýda Kaspıı jaǵasyndaǵy teńiz áskerıleriniń oqý-jattyǵý jumystary barysynda qaza tapqandardyń sebepterin anyqtaýǵa qurylǵan arnaıy komısıa óz jumysyn jalǵastyrýda. Munda «Ortalyq-2015» áskerı oqý-jattyǵýlary barysynda tórt birdeı BTR-80 ekıpaj múshelerimen birge sýǵa batyp ketken. Aldyn ala boljamdar boıynsha 4 áskerı kóz jumǵan. Oalardyń barlyǵy da Qazaqstannyń aımaqtarynan arnaıy shaqyrtylǵandar bolǵan. Sondaı-aq taǵy eki jaýynger aýyr dene jaraqatyn alǵan.
Arnaıy komısıa anyqtaǵandaı, jattyǵý kezinde qaza tapqandardyń aty-jónderi belgili boldy. KTK telearnasynyń málimetinshe, olar 19 jastaǵy Baýyrjan Joldabaı, ol Ońtústik Qazaqstan oblysynyń Sozaq aýdanynan shaqyrtylǵan, 19 jastaǵy Asyljan Mahambetov, ol Atyraý oblysynyń Qulsary aýdanynan shaqyrtylǵan. Sonymen qatar, máıithanaǵa 23 jastaǵy Zamır Ádilovtiń denesi jetkizildi, ol Almaty oblysynyń Eńbekshiqazaq aýdanynan barǵan jáne 19 jastaǵy Baqytjan Qalybaı, ol Atyraý oblysynyń Maqat aýlynan barǵan.
"Teńizden shamamen 150 metr ótkennen keıin qatty jel men joǵary tolqyn saldarynan tórt BTR-80 sýǵa batyp ketti. Eki tehnıka óz kúshimen jaǵalaýǵa shyqty. Aldyn-ala málimet boıynsha merzimdi qyzmettiń 4 áskerı qyzmetshisi sýǵa batyp ketken", - dep habarlady baspasóz qyzmetindegiler. Sonymen qatar, QR Qorǵanys mınıstri Imanǵalı Tasmaǵambetovtyń QR Qorǵanys mınıstrligi Bas ınspeksıasyna jaǵdaıdyń sebebin tolyq anyqtaý úshin jedel arnaıy top quryp, oqıǵa ornyna barýdy tapsyrǵan.
