Mańǵystaý oblysynyń ákimi Serikbaı Trumov aımaqqa jumys saparymen kelgen QR aýylsharýashylyǵy mınıstriniń mindetin atqarýshy Erbol Qarashókeevke birqatar usynys joldady.

1. Mańǵystaý óńirinde tórt túlikti ósirýge qatysty keshendi ǵylymı-saraptaý jumysyn júrgizip berýdi surady.

2. Qazir elimizdiń ózge oblystarynda bir tonna shóptiń baǵasy 5 myń teńge, bul Mańǵystaýǵa jetkizilgenshe jol shyǵyny qosylyp, bir tonna shóp 15 myń teńgege kóterilip otyr. Bul jaǵdaı óńir sharýalarynyń qaltasyna aýyr tıýde degen oblys ákimi S.Trumov aýylsharýashylyǵy mınıstriniń mindetin atqarýshy E.Qarashókeevten jem-shóp tasymalynyń shyǵynyn jabý úshin sýbsıdıa bólýdi qarastyrýdy surady.

3. Sharýalardyń qudyq qazýǵa ketken shyǵynynyń 80% sýbsıdıalaýdy surady.

Aıta keteıik, Mańǵystaý oblysyna eki kúndik jumys sapary barysynda Aýyl sharýashylyǵy mınıstriniń mindetin atqarýshy Erbol Qarashókeev Qaraqıa, Túpqaraǵan jáne Mańǵystaý aýdandarynyń mal ósirýshilerimen, sharýa qojalyqtarynyń basshylarymen jáne kásipkerlerimen kezdesti. Jergilikti deńgeıde azyqpen qamtamasyz etý boıynsha qabyldanyp jatqan sharalarmen tanysty. Oblys ákimimen kezdesip, óńirdiń aýyl sharýashylyǵyn damytý máseleleri jónindegi keńeske qatysty.

Keńeste belgili bolǵandaı, elden azyq shyǵarýǵa tyıym salý boıynsha sharalar qabyldanatyn bolady. Jemshóp daıyndaý úshin arzandatylǵan JJM kólemderin qaıta bólý máselesi de qosymsha qarastyrylýda.

Mal sharýashylyǵyn qoldaý úshin, óńirde fermerlerdiń kredıtter boıynsha tólemderin uzartý máselesi qaralatyn bolady.

– Ákimdikpen birlesip jem-shóp óndirisin damytý jáne jaıylymdardy jaqsartý boıynsha júıeli sharalar qabyldaıtyn bolamyz. Munda barlyq ıesiz jatqan qudyqtar men uńǵymalardy túgendeý, sý bógetterin salý jáne ǵalymdarmen birlese otyryp qurǵaq daqyldardy ósirý qajet, – dep atap ótti Qarashókeev.

Sapar qorytyndysy boıynsha usynys, tilekter Úkimet deńgeıine qaraýǵa shyǵarylmaq.

Jalpy Mańǵystaý oblysynda tórt túlikti jem-shóppen qamtý úshin birqatar jumystar jasaldy.

Aýylsharýashylyǵy mınıstrliginiń qoldaýymen 1733 tonna arpaǵa kelisim jasaldy. Jergilikti búdjet esebinen 54 mln.teńge qarastyrylyp, «Kaspıı» ÁKK 637 tonna arpa satyp aldy. Arpanyń alǵashqy bóligi óńirge jetkizilip, 19 maýsymnan bastap satylymǵa shyǵaryldy. Búgingi kúni 592 tonna arpa qala jáne aýdandarda satylyp, 45 tonna sattyqta tur. 1 kg arpa baǵasy 92 teńge. Qalǵan arpa jaqyn kúnderi elimizdiń soltústiginen Mańǵystaýǵa jóneltiledi.

Oblysty naryqtyq baǵadan tómen jem-shóppen qamtamasyz etý úshin jergilikti búdjet esebinen 150 mln teńge qarajat kózi bólingen bolatyn. Qazirgi tańda 0,1 % nesıe qarajatyn alýǵa nıetti, Aqtóbe oblysynan shópti tasymaldap ákeletin operatorlar anyqtaldy. Atalǵan baǵytta jumystar jalǵasýda.

Aýyl sharýashylyǵy janýarlarynyń qystaýy úshin azyq qunyn arzandatýǵa Úkimet rezervinen 1,9 mlrd teńge bólindi. Bul qarjy otbasylyq sharýashylyqtarǵa, sharýa qojalyqtary men jeke-qosalqy sharýashylyqtarǵa (LPH) beriledi. Qarjy túsken boıda atqarýshy organ tarapynan úlestiriledi.

Taǵy bir jańalyq, óńirdegi tabıǵı rezervattarǵa mal jaıý jáne sol jerlerden shóp shabý jóninde kelisim jasaldy. Qazirgi ýaqytta Bopaı men Tasorpa rezervattarynda shóp shabý jumystary bastalyp ta ketti. Toǵyz shóp shabýshy brıgada jumys isteýde.

Mańǵystaý oblysy ákiminiń baspasóz qyzmeti