Atyraýda keshe «Azamattyq bastama» qozǵalysy belsendileriniń uıymdastyrýymen komýnaldyq tarıfterdiń ósýine jáne aımaqtaǵy ekologıalyq jaǵdaıdyń nasharlaýyna baılanysty narazylyq aksıasy uıymdastyrylǵan. Bul týraly «Qamshy» portaly Azattyqqa silteme jasaı otyryp habarlaıdy.

Atyraý turǵyndary búgingi mıtıńke «Taza Atyraý úshin!», «Tarıfti ósirme!», «Tarıf óskende halyq kúızeledi, bıliktiń arany ashyla beredi, zań jumys istemeıdi», «Men ákimder jalaqy alý úshin salyq tóleımin», «Ákim Baqtyqoja İzmuhambetov, tarıfti aýyzdyqtaı almasań, jalaqy alma!» degen jazýlar ustap shyqqan.

Bul týraly «Azattyqqa» mıtıń uıymdastyrýshylarynyń biri - «Arlan» qoǵamdyq birlestiginiń jetekshisi Maks Boqaev habarlaǵan.

Qoǵamdyq birlestik jetekshisi Maks Boqaevtyń aıtýynsha, jıyndy uıymdastyrýdaǵy basty maqsat – aımaqta qordalanǵan áleýmettik, ekologıalyq jáne ekonomıkalyq kúrdeli problemalarǵa memlekettik organdardyń nazaryn aýdarý.

Maks Boqaev, «Arlan» qoǵamdyq birlestiginiń jetekshisi:

– Ásirese sońǵy kezde komýnaldyq qyzmet túrleri baǵasynyń qymbattaýy men qorshaǵan ortanyń jaǵdaıy turǵyndardy alańdatady, bılik bul máselelerde halyqtyń pikirin eskermeı otyr. Biz bılikten aımaqqa qatysty sheshimderdi qoǵamnyń pikirin eskerip qabyldaýdy talap ettik. Mıtıń rezolúsıasy tıisti organdarǵa jiberiledi

Mıtıńke qatysýshylar bılikten mektepte balalardy tegin tamaqpen qamtamasyz etýdi, tabıǵat qorǵaý zańyn buzǵandary úshin kompanıalardan túsken aıyppuldardy aımaqtyń ekologıasyn jaqsatýǵa qaldyrýdy talap etken. Sonymen birge, kásipkerler paıdalanylǵan gaz úshin ózderinen monopolıs mekemeniń aldyn ala tólem suramaýy týraly bılikke usynys bildirgen.

Belsendi bir jarym saǵatqa jalǵasqan mıtıńke júzden asa adam qatysqanyn habarlaǵan.