Shymkent qalasynyń ákimi Murat Áıtenovtiń tóraǵalyǵymen ınvestısıalyq shtabtyń kezekti otyrysy ótti. Onda 8 joba tanystyrylyp, ózekti máseleleri talqylandy.

«Ońtústik» arnaıy ekonomıkalyq aımaǵynan taǵy bir aıaq kıim shyǵaratyn jańa kásiporyn ashylmaq. Ol úshin óndiristik aımaqtan 1 gektar jer beriletin bolyp sheshildi. Qala ákimi jobamen tanysyp, ınfraqurylym men ekonomıkalyq aımaqtyń jeńildikterin uıymdastyrý turǵysynda memlekettik qoldaý kórsetiletinin aıtty.

Taǵy bir joba - keńselik jáne tıpografıalyq qaǵaz shyǵarýǵa baǵyttalǵan. Quny – 621 mln teńge bolatyn kásiporyn iske qosylǵan kezde ónimin ishki naryqqa jáne TMD elderine shyǵarady. Mekemege «Ońtústik» arnaıy ekonomıkalyq aımaǵynan 1,96 gektar jer berilgen. Búginde barlyq qajetti qural-jabdyqtar satyp alynǵan. Kásipker jer jáne ınfraqurylymmen tolyq qamtamasyz etý jóninde kómek surady. Jobaǵa qoldaý kórsetiletin bolady.

Odan ózge, mańyzdy jobanyń biri – óndiristik aýmaq qurý týraly boldy. «ADS Industries» JSHS túrli kásipke arnalǵan dúńgirshek salýdy josparlap otyr. Kásipker oǵan 1 gektar jer surap otyr. Shahar basshysy qala ishinen jer taýyp berip, barlyq qoldaýdy kórsetetin bolyp sheshim qabyldandy.

Al, «JANNA ELTANOVA» JSHS kıim, aıaq kıim men shulyqtar shyǵarmaq. Oǵan «Ońtústik» arnaıy ekonomıkalyq aımaǵynan 0,7 gektar jer berildi. Búginde onda jer jumystary bastalǵan, transformator qoıylǵan. Qala ákimi jerdi jalǵa berý aqysy, daıyn ınfraqurylym men ekonomıkalyq aımaqtyń jeńildikterin uıymdastyrý turǵysynda memlkettik qoldaý kórsetiletinin jetkizdi.

«Asar House» turǵyn úı keshenin salýǵa nıetti kásipker jeriniń nysanaly maqsatyn ózgertip berýin surady. Murat Áıtenov kóp qabatty turǵyn úıdiń eskızdik jobasy men ornalasatyn orny boıynsha qalanyń Bas arhıtektorymen birge qarap, usynys engizýdi tapsyrdy.

«Shtabteks» kásiporny aralas jáne maqta-mata shyǵarýdy qolǵa almaq. Jańa mekeme arqyly 100 adamdy jumyspen qamtı alatynyn aıtqan JSHS jetekshisi jer bólýdi jáne daıyn ınfraqurylym arqyly AEA-ta jeńildikter qarastyryp berýdi surady. Joba shtab barysynda qoldaý taýyp, «Ońtústik» AEA-tan 1 gektar jer bólinetin bolyp sheshildi.

Taǵy bir ınvestor toqyma emes materıaldar óndirisin ashpaq. Jobany iske qosý úshin memlekettik qoldaý retinde «Ońtústik» AEA-tan 0,8 gektar jer berilip, ınfraqurylymmen qamtamasyz etiletin boldy.

Qurylysta mańyzdy bolyp tabylatyn gazoblok óndirisin ashý týraly jobany «Asyl Órken Qurylys» JSHS usyndy. Táýligine 60 tekshe gazoblok shyǵaratyn kásiporyndy iske qosý úshin 0,5 gektar jer surap otyr. Qala ákimi «Juldyz» ındýstrıaldy aımaǵynan jer qarastyrý boıynsha sala basshysyna usynys berýin tapsyrdy.

Jıyndy qorytyndylaǵan shahar basshysy shtabqa usynylatyn árbir jobanyń ózindik ereksheligi men tıimdiligine mán berýdi júktedi. Sala jetekshilerine ınvestısıa tartý máselesindegi túıtkilderdi zerdelep, hattamalyq negizde baqylaýǵa alýdy tapsyrdy.