Memleket basshysynyń buqaralyq jáne balalar sportyn damytý boıynsha bergen tapsyrmasyna sáıkes, Shymkentte sportty qoljetimdi etý maqsatynda kóptep ashyq sport alańshalary men balalar oıyn alańdary salynyp jatyr.

Elimizdiń úshinshi megapolısinde qolǵa alynǵan «Halyq qatysatyn búdjet» jobasyna sáıkes bıyl Eńbekshi aýdanyna qarasty 18 shaǵynaýdandaǵy №6,7 úılerdiń aýlalaryna buqaralyq sportpen shuǵyldanýǵa arnalǵan jattyǵý alańshasy men balalar oıyn alańy ornatylatyn boldy. «Nýrstroıtransservıs» JSHS merdiger mekemesi tarapynan eskızdik joba daıyndalyp, maquldandy.

«Halyq qatysatyn búdjet» jobasyna qatysyp, jańalanyp jatqan aýlalar sońǵy ret 2013 jyly abattandyrylǵan. Aýlalardaǵy elementterdiń basym bóliginiń tozyǵy jetken, temirden jasalynǵan buıymdar.

Qazirgi tańda aýlalardy qaıta jańartý barysynda zamanaýı oıyn elmentteri ornatylyp, balalardyń qaýipsizdigi úshin oıyn alańshalarynyń edenderine rezeńke jabyn tóseledi. 3 D oıyn kesheni, átkenshekter, terbelmeli teńgergish, qumsalǵysh, terbelmeli motosıkl, terbelmeli jylqy oıyn elementteri ornatylady.

Odan bólek jeńil atletıkamen aınalysatyn «Street workout», trenajer alańshasy ornatylady. Qurylysqa qoldanatyn zattardyń barlyǵy tek otandyq ónim bolady deıdi merdigerler. Tipti oıyn alańshasyna tóseletin rezeńke tósenishtiń ózi Shymkentte jasalady eken.