Shymkenttik Nazarbaev Zıatkerlik mektebiniń oqýshysy Qazaqstan tarıhynda alǵash ret geografıadan IGEO – 2021 Halyqaralyq olımpıadasynyń kúmis júldegeri atandy.

Búgin Shymkent qalasy hımıa-bıologıa baǵytyndaǵy Nazarbaev Zıatkerlik mektebinde geografıa páninen ótken Halyqaralyq olımpıadanyń kúmis júldegeri zıatker oqýshy Tazabek Erkebulandy júldesimen quttyqtaý rásimi ótti. Quttyqtaý rásimine Shymkent qalasy bilim basqarmasynyń basshysy Janat Arysbekqyzy Tájıeva, Shymkent qalasy hımıa-bıologıa baǵytyndaǵy Nazarbaev Zıatkerlik mektebiniń dırektory Kaıyrbek Sabıtuly Býksýkbaev jáne zıatker oqýshy Erkebulannyń ata-anasy qatysty.

Geografıa páninen Halyqaralyq olımpıada 1996 jyldan beri Halyqaralyq geografıalyq odaqtyń jetekshiligimen ótkizilip keledi. Alǵashqy zıatkerlik jarys Gaagada uıymdastyrylsa, bıyl olımpıada astanasy Ystambul atanyp, qashyqtan ótkizildi. Jeńis úshin álemniń 46 elinen 200 oqýshy baq synasyp, onyń ekeýi Nazarbaev Zıatkerlik mektepteriniń oqýshylaryna buıyrdy – elge birinshi altyndy Aqtóbedegi zıatkerlik mektep oqýshysy Rýstam Valeev ıelense, al kúmis medaldi Shymkent qalasyndaǵy hımıa-bıologıa baǵytyndaǵy NIS oqýshysy Erkebulan Tazabek jeńip aldy.

Jıynda alǵy sóz alǵan Shymkent qalasy bilim basqarmasynyń basshysy Janat Arysbekqyzy elimizdiń keleshegi daryndy jastardyń qolynda ekendigin sóz etip, jas Zıatkerge sáttilik tiledi.

- Búginde qalamyzdyń bilim salasy men bilim berý úrdisi joǵarǵy deńgeıge kóterilip, birshama jetistikterge ıe bolyp keledi. Dál osy bilim berý salasynyń ósip órkendeýine sebepshi bizdiń qalamyzdyń bilim ordalary, ıaǵnı, barlyǵy mektepterdiń jáne bilikti ustazdardyń arqasynda dep bilemin. Bilim salasyna óziniń edáýir úlesin qosyp kele jatqan mektepterdiń biri qalamyzdaǵy hımıa-bıologıa baǵytyndaǵy Nazarbaev Zıatkerlik mektebi. Buǵan dálel mine búgingi Erkebulandaı ozat, zıatker oqýshylar,- dedi Janat tájıeva, shymkent qalasy bilim basqarmasynyń basshysy. 

Qalalyq bilim basqarmasynyń atynan Erkebulannyń ata-anasyna alǵys hat jáne zıatker oqýshymyzǵa arnaıy gramota men smart saǵaty jáne kitap syıǵa tartý etildi. Ár shákirttiń artynda qashan da bilikti de bilimdi ustaz turady, demekshi Erkebulannyń jetekshisi HBB NIS-tiń geografıa páni muǵalimi Aqbope Jamanqulqyzy da qurmet gramotasymen marapattaldy.

Sonymen qatar, Shymkent qalasy hımıa-bıologıa baǵytyndaǵy Nazarbaev Zıatkerlik mektebiniń dırektory Kaıyrbek Sabıtuly Býksýkbaev myrzanyń atynan Erkebulannyń ata-anasyna arnaıy alǵys hat pen gúl shoqtary tabys etildi.