Shymkent qalasynyń ákimi Murat Áıtenov sala mamandarymen birge megapolıstiń aldaǵy jylytý maýsymyna daıyndyq barysyn pysyqtady.
Búginde qaladaǵy jylý júıesine qosylǵan 1945 kópqabatty úıdiń 93 paıyzy jylytý maýsymyna tolyq daıyn. Al, qalǵan úılerge jylýdy jetkizý júıelerinde jóndeý jumystary qarqyndy júrip jatyr. Osylaı degen qalalyq energetıka jáne ınfraqurylymdy damytý basqarmasynyń basshysy Boranbaı Bolatbekov búdjettik nysandar 98 paıyzǵa daıyn ekenin málimdedi.
Qala aýmaǵynda 482 búdjettik nysan ornalasqan, búgingi tańda 474 nysan daıyndaldy. Iaǵnı, nysandardyń 98% aldaǵy jylytý maýsymyna daıyn. Atap aıtqanda 256 bilim nysany, 33 sport jáne 14 áleýmettik obektilerdiń barlyǵy daıyn. Al, densaýlyq saqtaýdaǵy 109 nysannyń búginde 103 daıyn, ol 94 paıyz, mádenıet salasynda 70 nysan bolsa, onyń 97 paıyzy daıyndalǵan.
Búdjettik nysandardyń kómirge qajettiligi 4,7 myń tonna, tasymaldanǵany 4,6 myń tonna, suıyq otynǵa qajettiligi 980 tonna bolsa, tolyq qamtamasyz etilgen. Qajetti otyn kólemi 1 qyrkúıekke deıin jetkizilýi tıis.
Sonymen qatar sala jetekshisi qalada eskirgen jylý qubyrlaryn aýystyrý jumystary qarqyndy túrde júrgizilip jatqanyn atap ótti. Onyń aıtýynsha, osy jyly jylý júıeleriniń tozý deńgeıin tómendetý maqsatynda jergilikti búdjetten 1,96 mlrd. teńge qaralyp, 29,5 km jylý júıelerine aǵymdaǵy jóndeý jumystary júrgizilýde eken. Búgingi kúnge jumystardyń 84 paıyzy oryndalǵan, ol 24,7 km. Kestege sáıkes qyrkúıek aıynyń sońyna deıin tolyq aıaqtalady. Qalanyń jylý júıeleriniń uzyndyǵy 419,3 km, jylý maýsymynan soń 100% qysymmen tekserý jumystary júrgizilip, 84 aqaý oryn alyp, tolyq qalpyna keltirildi.
«3-Energoortalyq» AQ-da qysqy maýsymǵa daıyndyq jumystary júrgizilýde. Mekemeniń rezervtik otynǵa qajettiligi 8 myń tonna, qoımada 7,8 myń tonna bar (98%). Al, «Qýatjylýortalyq-3» MKK-na qarasty qaladaǵy 12 dana jylý qazandyqtardan qysqy maýsymǵa daıyndalǵany 11. Eki qazandyqqa qajetti kómir kólemi 1,1 myń tonna, qoımada 600 tonna kómir bar, qalǵan kólemi 1 qazanǵa deıin tolyq tasymaldanady. Qala aýmaǵynda ornalasqan jylý júıesindegi 17 sorǵy stansalardan qysqy maýsymǵa daıyndalǵany 15, qalǵan eki sorǵy stansalarda daıyndyq jumystary júrgizilýde.
Turǵyndardyń ómir súrýine qolaıly jaǵdaı jasaý basty maqsattardyń biri ekenin aıtqan qala basshysy josparlanǵan jóndeý jumystaryn belgilengen merzimde aıaqtaýdy tapsyrdy. Sonymen birge qajetti kólemde otyndy aldyn ala jetkizýdi qamtamasyz etýdi, ishki naryqta baǵalardyń ósýine jáne kómirdiń tapshylyǵyna jol bermeý úshin turaqty tekserý jumystaryn uıymdastyrýdy aıtty
