Shymkent – Qazaqstannyń jetekshi ónerkásiptik jáne ekonomıkalyq ortalyqtarynyń biri. Megapolıs ortalyǵynda aýyl sharýashylyǵy salasyn damytýǵa qolaıly bolmasa da, qala aýmaǵynda ettik-súttik mal sharýashylyǵy men ósimdik sharýashylyǵynyń turaqty damýyna múmkindik berilgen.

Aýyl sharýashylyǵy salasyn damytý baǵytynda júıeli jumystardy júrgizý men memlekettik qoldaýdyń nátıjesinde aýyl sharýashylyǵynyń jalpy ónim kólemi ósken. Máselen, 7 aıda aýyl sharýashylyǵynyń jalpy ónim kólemi 3 paıyzǵa artqan. Ósim negizinen mal sharýashylyǵyndaǵy óndiris kólemi 3,2% - ǵa, onyń ishinde tiri salmaqtaǵy et 3,2% - ǵa jáne sút 2,6% - ǵa artý esebinen bolǵan.

Et ónimderine degen suranys pen usynystyń tepe-teńdigin qalyptastyrý maqsatynda qalada 7 mal bordaqylaý alańy ashyldy. Munda jalpy 3400 bas iri qara mal bordaqylanady. Bul jobalarǵa 2,3 mlrd. teńge ınvestısıa tartylyp, 30 jańa jumys orny quryldy.

Investısıalyq jobalardyń ishinde - «Naýryz» JSHS, «Baızakov E» JK, «Abdýkarımov» JK, «Narkýlov» JK, «Lapıev» JK-da mal bordaqylaý alańdary jańadan qurylǵan bolsa, «Altynsaı» men «Asyl-juldyz» sharýa qojalyqtary mal bordaqylaý alańdaryn keńeıtken.

Osy jyldyń jeti aıynda 9,8 myń tonna et óndirilse, jyl sońyna deıin 14,6 myń tonna et óndirý kózdelýde.

Esepti kezeńderi qara mal sany 80,4 myń basty, qoı men eshki sany 92,6 myń basty, jylqy –14,1 myń bas, qus 934,7 myń basty qurady. Ótken jylǵymen salystyrǵanda ósim baıqalady. Buǵan mal ósirýshilerge degen memlekettik qoldaý sharalarynyń artýy yqpal etti.

Aıta keteıik, et baǵasynyń ósýi óndiristiń nemese mal basynyń jetispeýshiligine baılanysty emes. Naryqtyq ekonomıka jaǵdaıynda aýyl sharýashylyǵy ónimine jáne taýarlardyń basqa túrlerine baǵany kásipkerler óndiris, saqtaý, tasymaldaý kezinde jumsaǵan shyǵyndardy eskere otyryp, suranys pen usynys negizinde derbes belgileıtinin atap ótý qajet. Sonymen qatar, baǵaǵa syrtqy faktor – kórshi elder men halyqaralyq naryqtardaǵy uqsas ónimder baǵasynyń ózgerýi de áser etedi.