Keshe, 26 tamyz kúni keshkisin «Shymkentsıtı» shaǵyn aýdanynyń 30 shaqty turǵyny joldy jaýyp, gaz berilýin talap etti.

Oqıǵa ornyna qalalyq energetıka jáne ınfraqurylymdy damytý, qurylys basqarmalarynyń, Qarataý aýdany ákimdiginiń jáne «Qýatjylý» mekemesiniń jaýapty ókilderi baryp, narazy toppen kezdesti, máseleni jan-jaqty túsindirdi. Jaǵdaı rettelip, jol qozǵalysy qalpyna keltirildi.

Qalanyń soltústik bóligin, onyń ishinde «Shymkentsıtı» shaǵyn aýdanyn tabıǵı gazben qamtý máselesi birinshi kezekte atqarylýy tıis jumystardyń tizimine engen. Jumys tártibine sáıkes, gaz júıelerin júrgizýdiń jobalyq-smetalyq qujattary ázirlenip, memlekettik saraptama qorytyndysy alynǵan. Joba qarjylandyrý josparyna enip, birneshe kezeńdi qamtıtyn qurylys-montajdaý jumystary aıaqtaldy.

Jobanyń qurylymynda eń negizgi jáne aýqymdy jumys kólemi - N3 avtomattandyrylǵan gaz taratý stansıasy (AGRS) men magıstraldy gaz qubyrlaryn tartý qurylystaryna tıesili. İshki oramdyq gaz júıelerin tartyp, ortalyq júıege qosý - qurylystyń eń sońǵy satysynda atqarylatyn is.

Negizinde, jospar boıynsha gaz taratý stansıasynyń qurylysy 2022 jyly aıaqtalýy tıis bolatyn. Qala ákimdigi atalǵan jobanyń mańyzdylyǵyn eskere kele jumystardy jedeldetip, jobany merziminen buryn iske qosý jóninde bastama kótergen-di. Qazirgi tańda gaz taratý stansıasy men magıstraldy gaz qubyrynyń qurylysy tolyq aıaqtaldy. Tehnıkalyq talaptarǵa sáıkes synama jumystary atqarylýda. Stansıa men magıstraldyq jeliler qaýiptiligi joǵary nysandar sanatyna jatatyndyqtan, qazirgi kezde laborotorıalyq jáne tehnıkalyq qadaǵalaý synaqtarynan ótkizilýde.

Qurylysy bıylǵy jyly aıaqtalýy tıis barlyq tabıǵı gaz nysandary jylytý maýsymyna deıingi merzimde iske qosý máselesi qala ákiminiń tikeleı baqylaýynda.