Úshinshi megapolıste jańa 2021-2022 oqý jyly dástúrli formatta bolmaq. Sonymen qatar bıyl pandemıalyq jaǵdaıǵa baılanysty mektep formasy mindettelmeıdi. Bul týraly aqparattyq-kommýnıkasıalyq ortalyqta ótken baspasóz jıynynda Shymkent qalasy bilim basqarmasynyń basshysy Janat Tájıeva málimdedi.

Búginde Shymkent qalasynyń bilim berý uıymdary jańa oqý jylyna saqadaı saı. Máselen, oqýlyqtar men kórkem ádebıetter bilim oshaqtaryna 100% jetkizildi. Al, beınebaqylaý júıesi men týrnıketter tolyq ornatylǵan. Bul rette oqýshylar jańa oqý jylyn dástúrli formatta bastaıdy.

Jańa 2021-2022 oqý jylynda oqýshylarǵa mektep formasy mindettelmeıdi, alaıda klasıkalyq úlgidegi yńǵaıly kıimmen kelýge ruqsat. Al 30 myń teńge kóleminde bir rettik qarjylaı kómek alǵan otbasylar, ıaǵnı 57 466 bala mektep formasyn alýǵa mindetti.

Osy oraıda 1 qyrkúıek kúni bilim tabaldyryǵyn attaǵan búldirshinder úshin saltanatty jıyn ótedi, qalǵan synyp oqýshylaryna sanıtarlyq talaptardy saqtaı otyryp synyp saǵaty bolady.

Aıta keteıik, endi bilim oshaqtarynyń ár qabatynda sanıtaızerler qoıylyp, qol jýý tártibi ilinip turýy kerek. Dezınfeksıalyq zattardyń 1 aılyq qory bolýy tıis. Bul rette kúnine eki ret ylǵaldy, aptasyna bir ret jalpy tazalyq jumystary júrgizilýi qajet. Al synyp ishi 25 baladan aspaýy kerek.

Qaladaǵy barlyq bilim uıymynda «Ashyq» jobasy tolyq qosylǵan. Osy oraıda medısınalyq qarsy kórsetilimderi bar adamdardy sanamaǵanda pedagogtar men tehnıkalyq personaldar 100 paıyz vaksınasıalanǵan.

Sonymen qatar Janat Tájıeva epıdemıologıalyq jaǵdaıǵa baılanysty tárbıelenýshilerdiń ata-analaryn vaksına saldyrýǵa shaqyra otyryp, mekteptegi dezınfeksıalyq zattarǵa aqsha jınamaýdy ótindi. Óıtkeni bilim uıymdaryna qajettilik zattyń bárine qarjy bólinip otyrǵanyn arnaıy jetkizip, ata-ana balalaryn tek betperdemen qamtamasyz etý kerektigin aıtty.