Keshe Almaty oblysy Qarasaı aýdanyna qarasty Jańashamalǵan aýyldyq okrýgi mańynan Atajurtyna qonys aýdaryp kelgen qandastarmyzdyń «Barkól» dep atalatyn aýyly qurylyp, ondaǵy turǵyndardyń qonys toıy ótti. Bul týraly «Qamshy» portaly habarlaıdy.
2007 jyldyń basynan beri tarıhı Otandaryna aıaq basqan oralman baýyrlardyń óz kúshimen qurǵan «Barkól» aýlynyń ashylý saltanatyna aýdandyq jáne aýyldyq ákimshilik ókilderi, Qazaqstan ǵylymyna eńbegi sińgen qaıratkerler, ǵylym doktorlary men QHR-nan arnaıy kelgen qonaqtar qatysty.
Al, Qazaqstannyń estrada juldyzdary torqaly toıǵa arnaıy at terletip kelgen kópshilikke ánnen shashý shashty.
Elge kelip eńbegi janǵan baýyrlarymyzdyń osynaý qýanyshyna arnaıy aqsarbas mal soıylyp, aqshańqan kıiz úıler tigildi.
Aıta keteıik, «Barkól» aýylynyń ashylý saltanaty arnaıy «Qazaq handyǵynyń 550 jyldyǵyna» oraılastyrylyp otyr.
Búginde «Barkól» aýylynda qıyr shetten atajurtyna oralǵan 56 otbasy qonystanǵan. Aldaǵy ýaqytta aýylǵa qonystanýshylardyń qarasy 200 otbasyǵa deıin jetedi deıdi osy ıgi istiń uıytqysy bolyp júrgen ultjandy azamat, «Barkól» aýyldyq keńesiniń tóraǵasy Maqsutqan Dáleıuly.
2007 jyly atajurtyna tabany tıgen sátten bastap, Maqsutqan Dáleıuly óz qandastaryn baýyryna jınap, olardyń jer alýyna, baspana turǵyzýyna, áleýmettik turmysyna septigin tıgizip kele jatqany jasyryn emes. Bul tarıhı otanyna oralǵan ár qazaqtyń atqarýǵa tıis sharýasy bolǵanymen, kóp qazaqtyń qolynan kele bermeıtin erlikti Maqsutqan Dáleıuly jasaǵany aqıqat.
Ras, Maqsutqan Dáleıulynyń muryndyq bolýymen alyp megaplıs Almatynyń irgesinde qazaqy bolmysty aýyldyń boı kóterýi ardaqty azamattyń ult úshin qyzmet etý jolyndaǵy qajyrly eńbegi men adal nıetiniń kórinisi bolsa kerek-ti.
Maqsutqan Dáleıuly, «Barkól» aýyldyq tutyný korporatıviniń tóraǵasy:
-Biz bul jumystardy 2007 jyldan bastap qolǵa alǵan bolatynbyz. Alǵashynda túrli qıyndyqtar men kedergilerdiń bolǵany jasyryn emes. Qujattardy rásimdeý kezinde de kóp kedergiler boldy. Biraq, biz áý basta osy atajurtymyzǵa aıaq basqan baýyrlarymyzdy bir jerge toptastyrý ıdeıasy bolǵan. Elbasymyzdyń aıtqan sózi bar ǵoı: «Munda kelgen árbir qandasymyz Otannan ne alam dep emes, ne berem dep kelýi kerek»,- degen. Sóıtip, biz bastama kóterip, osy aýyldy qurý úshin jantalastyq. 2007 jyly osyndaǵy jeke tulǵalardan 12,5 gektar jer satyp aldyq. Qazir munda 56 otbasy qonys tepken. Aldaǵy ýaqytta aýylymyzǵa 200 otbasy sıatyndaı jerimiz bar. Aýyldy qurý úshin jergilikti jáne aýdandyq ákimshilik tarapynan qujattardy rásimdeý, elektr jaryǵyn tartý, sý qubyrlaryn retteý sekildi komýnaldyq jumystarǵa qoldaý boldy. Qazir aýylymyzǵa sý, elektr jaryǵy, tipti kógildir otynǵa deıin tartylǵan.
Beksultan Aqylbekuly, Jańashamalǵan aýyldyq okrýgi ákiminiń orynbasary:
Búginde álemniń otyzdaı elinen qazaqtar Atajurtyna qonys aýdaryp, óz elimen, jerimen tabysýda. Elbasy Nursultan Ábishuly Nazarbaevtyń «Qazaqstan – dúnıedegi ár qazaqtyń qasterli qubylasy! Qazaqstan – álemdegi barsha qazaqtyń qasterli qara shańyraǵy!» degen sózi bar ǵoı. Búgingi otandastarymyzdyń qurǵan aýyly maldy, jandy bolsyn deımiz. Biz de aldaǵy ýaqyttarda óz qolymyzdan kómegimizdi kórsetip otyratyn bolamyz. Al áleýmettik nysandarǵa keletin bolsaq, bul birinshiden saıajaı kesheni retinde tirkelgendikten, mundaǵy otbasylar baý-baqsha sharýashylyqtarmen aınalysady dep josparlanǵan. Sondyqtan bul aýylǵa áli aýyl statýsy berilmegendikten, qandaı da bir áleýmettik nysandardy; emhana, balabaqsha, mektep t.b. salý josparlanbaǵan. Dese de, jaqyn mańda osy «Barkól» aýyly turǵyndaryna arnap aýyldyń mańynan Meshit turǵyzýdy josparlap otyrmyz. Meshittiń orny naqty belgilenip qoıdy. Al aýyl turǵyndaryna arnap kóshliles ornalasqan Turar aýylynan keler jyly balabaqsha ashý josparda bar. Qazirdiń ózinde bul aýyldyń balalary Turar aýylyndaǵy orta mektepke qatynap oqıdy. Ol úshin aýdandyq bilim bóliminen arnaıy avtobýs bólingen. Ol avtobýs osy aýyldyń balalaryn sabaqqa aparyp, alyp kelýde. Jol máselesine keler bolsaq, qazir bizdiń búdjetimiz shekteýli bolǵandyqtan, bálen-túgen deýdiń ózi qıyndaý. Eger aýyl turǵyndary ózderi bas bolyp, shaǵyl, tasyn satyp alatyn bolsa, aýyldyq ákimshilik tehnıkalyq jaǵynan kómektesetin bolady.
Nurgeldi Ábdiǵanıuly
Sýretterdi túsirgen: Aıan Amanǵalı
