Erteń elimizde emhanaǵa tirkelý naýqany bastalady. Eki aıǵa sozylatyn jyl saıynǵy dástúrli shara 15-qarashada aıaqtalady. Bul týraly aqparattyq-kommýnıkasıalyq ortalyǵynda ótken brıfıńte Shymkent qalasynyń densaýlyq saqtaý basqarmasynyń basshysy Baqytjan Pozılov málimdedi.

Basqarma basshysynyń sózinshe, elimizdiń ár azamaty jylyna bir ret emhanany erkin tańdaı alady.

«Emhanany tańdaý naýqany eki aıǵa sozylady. Iaǵnı, 15-qyrkúıek pen 15-qarasha aralyǵynda. Qazaqstannyń kez-kelgen azamaty osy naýqanǵa qatysyp, óziniń emhanasyn tańdaı alady. Naýqannyń maqsaty - qaralyp júrgen emhanasyna kóńili tolmaıtyn azamattarǵa emdeý mekemesin aýystyrýǵa múmkindik berý»,-dedi B.Pozılov.

Brıfıń barysynda sóz alǵan «Áleýmettik medısınalyq saqtandyrý qory» Shymkent qalasy boıynsha fılıalynyń dırektory Sábıt Quralbek byltyrǵy tirkeý naýqany barysynda 18 myńnan astam qala turǵyny emhana tańdaý quqyǵyn paıdalanǵanyn atap ótti. Onyń aıtýynsha, emhana tańdaý barysynda turǵyndardyń basym bóligi memlekettik emhanaǵa tirkelgen eken.

Aıta keteıik, bıyl medısınalyq-sanıtarıalyq alǵashqy kómek kórsetetin medısınalyq uıymdarǵa tirkelý tártibine ózgerister engizildi. Olar tek sheteldik azamattar men eńbek mıgranttaryna qatysty bolady deıdi mindetti áleýmettik medısınalyq saqtandyrý qorynyń ókilderi.

Jańa qaǵıdalarǵa sáıkes, eldiń aýmaǵynda ýaqytsha bolatyn nemese baspana izdep júrgen azamattyǵy joq sheteldik adamdardy emhanaǵa bekitý erikti medısınalyq saqtandyrý shartynyń negizinde jáne onyń qoldanylý merzimine ǵana júzege asyrylady. Osydan keıin olar medısınalyq uıymnan avtomatty túrde shyǵarylady.

Emhanaǵa tirkeý nemese qaıta bekitý kezinde emhanany turǵylyqty jerine jaqyn jerden tańdaý usynylady. Sebebi naýqas medısınalyq kómekti qajet bolǵanda, ýchaskelik dáriger úıine bara alatyndaı bolýy tıis. Bul ásirese pandemıa kezinde óte mańyzdy deıdi mamandar.

Aıta keteıik, qala boıynsha búgingi tańda 14 memlekettik jáne 87 jekemenshik emhana bar.