Shymkent halyq sany qarqyndy ósip jatqan qala sanatynda. Qalamyzdy zamanaýı bilim ortalyǵyna aınaldyrý – ýaqyt talaby. Shahardyń basty baılyǵy – onyń turǵyndary. Adamı kapıtaldy arttyrý mindeti qalamyzdyń bes jyldyq damý josparynyń mańyzdy tarmaǵy retinde endi.

Aldaǵy bes jyldyq kezeńde apatty, úsh aýysymdy mektepter máselesi túpkilikti sheshilip, yńǵaılastyrylǵan ǵımarattarda ornalasqan mektepterdiń ornyna tıptik úlgidegi mektepter salynbaq.

Osy jospar aıasynda bıylǵy jańa oqý jylynda bir mezette 20 jańa mektep iske qosyldy. Jyl sońyna deıin taǵy 4 mekteptiń qurylysy aıaqtalyp, oqýshylardy qabyldaıdy.

Bilim berý uıymdarynyń qurylys qarqynyn arttyrýda memlekettik-jekemenshik áriptestik oń nátıjesin berýde. Bıylǵy jyly qurylysy aıaqtalyp, tapsyrylǵan bilim berý uıymdarynyń ishinde 15 mektep memlekettik-jekemenshik áriptestik sheńberinde paıdalanýǵa berildi.

Osy sanattaǵy jańa bilim berý uıymdarynyń biri – «Abadan» jekemenshik mektebi. Uıym 550 balaǵa bilim berýge laıyqtalǵan. Qazir munda 350 oqýshy bilim alýda. Sabaqtar qazaq jáne orys tilderinde júrgiziledi. Oqýshylarǵa qosymsha sabaq retinde aǵylshyn tilin tereńdetip oqytý kýrstary uıymdastyrylǵan. Balalardyń tulǵalyq damýyn qamtamasyz etýde shahmat, dombyra, horeografıa, beıneleý óneri syndy shyǵarmashylyq úıirmeler jumys isteıdi.

Oqý kesheninde 24 synyptyq kabınet oqý jabdyqtarymen qamtylǵan, akt jáne sport zaldary, medısınalyq beket jáne asqana bólmeleri qarastyrylǵan.

Mekteptiń pedagog kadrlarynyń áleýetin 45 joǵary bilikti muǵalimderden quralǵan. Munda balalar jalpyǵa birdeı bilim standarty boıynsha sabaq ótedi. Oqýshylardyń úlgerimi men pedagog kadrlardyń biliktilik deńgeıine turaqty negizde iske asatyn baqylaý júıesi engizilgen.