Búgin QHA tóraǵasynyń orynbasary, QR Prezıdenti Ákimshiligi Qazaqstan halqy Assambleıasy hatshylyǵynyń meńgerýshisi Marat Ázilhanov Shymkentte qalalyq etnomádenı birlestikterdiń tóraǵalarymen jáne assambleıa janyndaǵy qoǵamdyq qurylymdardyń jetekshilerimen kezdesti.
Qazaqstan halqy Assambleıasynyń HHİH sesıasynda berilgen tapsyrmalardy sapaly júzege asyrý barysy talqylanǵan jıynda qalalyq QHA janyndaǵy Qoǵamdyq kelisim keńesiniń tóraǵasy Orynbaı Rahmanberdıev, qalalyq QHA tóraǵasynyń orynbasary, qalalyq koreı etnomádenı birlestiginiń tóraıymy Roza Pak, qalalyq ózbek etnomádenı birlestigi jastar qanatynyń múshesi Hýrmatoı Abdýhamıdova sóz sóılep, usynys-pikirlerin aıtty.
Bıyl QHA qyzmet baǵyty boıynsha Shymkentte 186 is-shara uıymdastyrylyp, Qoǵamdyq kelisim keńesterimen 19 másele qaraldy. Analar keńesteriniń bastamasymen 5 joba iske asty. Assambleıanyń medıatıvtik alańdarynda 53 daýly másele oń sheshildi.
Assambleıa janyndaǵy aqparattyq túsindirý toby etnos ókilderi kóptep shoǵyrlanǵan 23 shaǵyn aýdan men turǵyn alapta 138 maqsatty kezdesý ótkizdi.
Kezdesýde QR Prezıdenti Ákimshiligi Qazaqstan halqy Assambleıasy hatshylyǵynyń meńgerýshisi Marat Ázilhanov: «Kez kelgen memleket úshin qoǵamdyq kelisimniń mańyzdylyǵy erekshe. Táýelsizdigimizdiń 30 jyldyǵy ishinde Qazaqstandyqtardyń birligi men tutastyǵynyń arqasynda búgingi jetistikterge qol jetkizdik. Tatýlyǵymyzben Táýelsizdik tabystaryn odan ári eseleı túsýge, elimizde barshaǵa qolaıly orta qalyptastyrýǵa Assambleıa músheleri aldaǵy ýaqytta da jumyla jumys júrgizedi dep senim bildiremin» – dedi.
Assambleıa músheleriniń usynys-pikirlerin tyńdap, pikir almasqannan keıin QHA tóraǵasynyń orynbasary memlekettik saıasat aıasynda birlik pen tatýlyqty nyǵaıtýda belsendi qyzmet jasap júrgen birqatar azamattarǵa Alǵys hat tabystady.
