Qazaqstan Respýblıkasynyń Premer-mınıstri A.Mamınniń tóraǵalyǵymen ótken Úkimettiń búgingi otyrysynda birqatar mańyzdy máseleler qaraldy.
Epıdemıologıalyq ahýal jóninde habarlaǵan elimizdiń Densaýlyq saqtaý mınıstri A.Soı, Qazaqstanda vaksınanyń 1-komponentin 7,5 mln-nan astam adam alyp, vaksınasıalanýy tıis halyq sanynyń 75,8 paıyzyna jetkendigin aıtty. 2-komponentpen 6,4 mln-nan astam adam qamtylyp, ekpe alýy qajet halyqtyń 64,7 paıyzyna jetken. Shymkent qalasynda vaksınanyń birinshi komponentin 516 625 adam alyp, kórsetkish 96,4 paıyzǵa jetti. Ekinshi komponent 417 708 adamǵa salynyp, vaksına alýy tıis kontıngenttiń 77,9 paıyzy qamtyldy.
QR Indýstrıa jáne ınfraqurylymdyq damý mınıstri Beıbit Atamqulov ındýstrıalandyrý kartasynyń iske asyrylý barysy jaıly esep berdi. «2021 jyly óńirler jalpy somasy 1,23 trln teńge bolatyn 128 jobany iske qosýdy josparlap otyr. 12 myń turaqty jumys orny ashylady. Jobalardyń eń kóbi Shymkent qalasynda – 17 joba, Qaraǵandy jáne Shyǵys Qazaqstan oblystarynda - 14 jobadan», - degen mınıstr, osy óńirlerde oń serpin baıqalǵanyn aıtty.
Indýstrıalandyrý kartasy sheńberinde qalamyzda bıyl 17 jobany iske asyrý josparlanǵan. Onyń sheńberinde 40 mlrd teńge kólemindegi ınvestısıa tartylyp, 758 jańa jumys oryndary ashylmaq. Onyń ishinde bıylǵy toǵyz aıda 5 joba iske qosylyp, 385 jańa jumys oryndary ashylǵan. Tartylǵan ınvestısıa kólemi 12,6 mlrd. teńgeni quraıdy.
Jyl sońyna deıin Qazaqstandaǵy biregeı kásiporyn – «KazAlPack» allúmınıı bankalar óndirisi iske qosylady. 145 jumys ornymen ashylatyn bul jobany iske asyrýǵa 23,4 mlrd teńge ınvestısıa tartylǵan. Jyldyq qýaty 500 mln dana qalbyr bankalar shyǵaratyn kásiporyn elimizdegi shki suranystyń 65 paıyzyn qamtamasyz etpek.
Elimizdiń energetıka mınıstrligi úılestirýshisi bolyp tabylatyn energetıka salasyndaǵy respýblıkalyq ındýstrıalandyrý kartasyna Shymkent qalasynan 1 joba engen. «Shymkent hımıalyq kompanıasy» JSHS-niń metıl tret býtıl efıri men propılen óndirisi kásipornyn qurý úshin 25 mlrd teńge ınvestısıa tartylǵan. Kásiporyn 350 adamdy jumyspen qamtyp, jylyna 57 myń tonna ónim shyǵarmaq. Kásiporyn kelesi jyly iske qosylatyn bolady.
Memleket basshysy Qazaqstan halqyna arnaǵan Joldaýynda 2025 jylǵa qaraı óńdeýshi ónerkásip eksportyn 1,5 ese, eńbek ónimdiligin 30 paıyzǵa ulǵaıtý mindetin belgiledi. Indýstrıalandyrý kartasynyń jobalaryn ýaqtyly ári sapaly iske asyrý osy mindetterge qol jetkizýdi qamtamasyz etedi.
