Shymkent qalasyndaǵy №2 aýrýhana bazasyndaǵy ınsýlt ortalyǵy Prezıdent Joldaýy aıasyndaǵy tapsyrmalardy negizge ala otyryp, halyqqa táýlik boıy medısınalyq qyzmet kórsetýge kóshti.

Endi táýliktiń kez kelgen ýaqytynda ınsýlt alǵan naýqastarǵa dárigerler shuǵyl medısınalyq kómek kórsetip, ota jasaı alady. Osylaısha medısına mamandary ólim-jitim kórsetkishiniń aldyn alyp, ınsýlttiń saldarynan paıda bolatyn múgediktik sanyn azaıtpaq.

Aýrýhananyń bas dárigeri Asqar Rahmetalıevtiń bastamasymen naýqastar túngi ýaqytta da em qabyldaýy úshin osyndaı qolaıly jaǵdaı jasalyp otyr. Qalalyq №2 aýrýhana bazasynan kovıd ortalyǵy ashylyp, úsh aı boıy emdeý ortalyǵynyń mamandary qaýipti indetke shaldyqqan naýqastarǵa emdeý jumystaryn júrgizdi. Munda ınfeksıalyq stasıonar jumysyn toqtatyp, 17 qyrkúıekten beri aýrýhana qalypty rejımde jumys isteýde. Al aýrýhana bazasyndaǵy ınsýlt ortalyǵy birden táýlik boıy jumys isteýge kóshti.

Aıta keteıik, qalalyq №2 aýrýhanada sońǵy úlgidegi eksprert klasty bıplandy Philips Azurion 7 V20/15 angıografıalyq apparaty men ókpeni jasandy tynystandyrý, sıfrly rengen syndy ınsýlt aýrýyn emdeýge qajet apparattar ornatylǵan. Zamanaýı qurylǵylarmen Lıtva, Germanıa, Fransıa, Ulybrıtanıa, Ońtústik Koreıa, Túrkıa, Reseı Federasıasynda biliktiligin arttyryp kelgen mamandar jumys isteıdi.

24 saǵattyq rejımdegi ınsýlt ortalyǵynda bilikti mamandar 20 naýqasqa kúrdeli ota jasap úlgerdi. Onyń ishinde 18 naýqasqa ınsýlt, 2 naýqasqa júrek-qan tamyrlary boıynsha tiliksiz operasıa jasaldy. Hırýrgıalyq em jasalǵan naýqastardyń barlyǵynyń da em qabyldaý barysynda jaǵdaıy jaqsaryp, palataǵa aýystyrylǵan.