Shymkent qalasynyń ákimi Murat Áıtenov sıfrlandyrý basqarmasynyń basshysy Áset Abdirahanovtyń 9 aıda atqarǵan esebin tyńdady.

Qalada bazalyq stansıalar ornatý jumysy 2020 jyly úsh kezeń negizinde qolǵa alynǵan. Alǵashqy kezeńde qalada 11 núktege stansıa ornatylyp, mobıldi ınternetpen qamtý kórsetkishi 82% qurady.

Osy jyly ınternetpen qamtýdyń İİ-kezeńinde 14 núktege bazalyq stansıasyn ornatý jumysy júrýde. Onyń 8-i ınvestor esebinen, 6 núkte baılanys operatorlary jeke nysan ıelerimen birlese atqarýda.

Qazir 8 jerge (Tassaı, Yntymaq-2, Qaınarbulaq,Soltústik-Batys, Aeroport mańy, A-2 trassasy, R-32 trassasy Qursaı №49 mektep mańy) antena-machtalyq qurylǵy ornatylyp, elektr energıasyna jalǵaý jumystary júrgizilýde. Jyl sońyna deıin jelige qosylady.

Qalǵan 6 núktede (Abdýlabad,Zabadam,Asar,Samal-3, Nurtas, Qursaı - Jylysaı kóshesi mańy) bazalyq stansıalar ornatylyp, iske qosylǵan. Qala aýmaǵyndaǵy 14 bazalyq stansıalar tolyq jelige qosylsa, 136 071 otbasy sapaly ınternetpen qamtylady. Jyl sońyna deıin jelimen qamtý kórsetkishin 91%-ǵa jetkizý josparlanyp otyr.

Qalada bazalyq stansıany kóbeıtý úshin basqarma Óńiraralyq baılanys ınspeksıasymen birlese ınternettiń sapasyna taldaý jasaǵan. Taldanǵan 110 núkteniń 22-ne ınternet sapasy tómen ekeni anyqtalǵan.

Ázirlengen Jol kartasy sheńberinde sapasy tómen aýmaqtarǵa 2022-2023 jyldary bazalyq stansıasyn ornatý josparlanyp otyr. Bul jumystar júzege asyrylsa, qala aýmaǵy 100% sapaly ınternetpen qamtylady.