Jyl basynda Prezıdent Qasym-Jomart Toqaevtyń tapsyrmasyna sáıkes elimizde «Ańsaǵan sábı» áleýmettik baǵdarlamasyn iske asyrý bastaldy. Onyń maqsaty – qosalqy reprodýktıvtik tehnologıalardyń kómegimen shıelenisken otbasylyq-demografıalyq problemalardy sheshý.

Dúnıejúzilik densaýlyq saqtaý uıymynyń málimetteri boıynsha, osy reprodýktıvti tehnologıanyń nátıjesinde tıimdilik 45-60 paıyzdy quraıdy. Bul kórsetkish bizdiń elimizde orta eseppen 15% - dan 42% - ǵa deıin ósken. Bala týý faktisi boıynsha emdeý tıimdiliginiń kórsetkishi (take baby home) 30% deńgeıinde. Bul eń jaqsy eýropalyq klınıkalardyń kórsetkishine sáıkes keledi.

Qazaqstanda osy jyldan bastap bólinetin kvotalar sany 7000-ǵa deıin ósti. Bul kvotalardy berý aıǵaqtardy keńeıtýge jáne olardy alý úshin kezekti edáýir qysqartýǵa múmkindik beredi.

Búgingi tańda elimizde bedeýlikpen esepte 11030 áıel tur. Onyń ishinde Shymkentte bedeýlikpen esepte 338 jup tur. Bul jóninde qalalyq Densaýlyq saqtaý basqarmasynyń basshysy B.Pozılov baıandady.

Onyń aıtýynsha, bıyl Shymkent qalasyna «Ańsaǵan sábı» baǵdarlamasy aıasynda 403 kvota bólindi. Ázirge 340 kvota paıdalanylǵan. Bıyldan bastap ekoǵa buryn júginbegen jáne jeke medısınalyq ortalyqtarda baqylaýda bolǵan bedeýligi bar pasıentterdi belsendi túrde anyqtaýda.

EKU-ǵa daıyndyq júrgizetin qalalyq perınataldyq ortalyqtyń konsýltatıvti-dıagnostıkalyq blogy jetekshi medısınalyq uıym retinde bekitildi. Onda 2018 jyldan bastap «Bedeýlik máseleleri jónindegi Kabınet» jumys isteıdi.

Sondaı-aq, QRT úshin kvotalarǵa kezektilikti usynýdyń ashyqtyǵyn jáne pasıentterdi klınıkalarǵa ýaqtyly jiberýdi baqylaýdy qamtamasyz etý, monıtorıń júrgizý maqsatynda óńirlik komısıa qurylyp bekitilgen.