Shymkent qalasynda qala ákiminiń tapsyrmasy negizinde, bilim salasynda bes jylǵa arnalǵan júıeli jospar qurylǵan. Bilim salasy zerdelenip, 72 jańa mekteptiń qurylysy josparlanyp otyr.

Bekitilgen qujatta úshaýysymdy mektepter máselesin tolyqtaı sheshýdi jáne mektebi joq eldi mekenderge mektep salý jobasy qaralǵan. Bıyl qaladaǵy úshaýysymdy mektep sany 19-dan 10-ǵa kemise, 2024 jylǵa kelip bul másele túbegeıli sheshimin tabady.

Qalada bilim sapasyn jaqsartý maqsatynda eń áýeli ustazdardyń biliktilik deńgeıin kóterý kózdelip otyr. Qazir bilim mekemelerinde joǵary jáne i sanatty ustazdar 59,5 paıyzdy qurasa, 2025 jyly 85,9 paıyzǵa artady.

Sonymen qatar, aldaǵy bes jylda tehnıkalyq jáne kásiptik bilim berý salasynda dýaldy oqytýdyń úlesin arttyrý kózdelgen. Bolashaq mamandardy oqý orny men kásiporyndar birlesip bilim berýi – túlekterdiń jumysqa ornalasý kórsetkishin joǵarylatady.

Osyǵan oraı, Shymkent qalasyn damytý Jol kartasyna sáıkes dýaldy oqytý boıynsha stýdentter sanyn arttyryp, 2021 jyly 11,3%, 2022 jyly 18,1%, 2023 jyly 22,6%, 2024 jyly 27,1%, 2025 jyly 42% deıin kóterý josparlanyp otyr. Dýaldy oqytý barysynda jumys berýshilerdiń suranys, talaptaryna saı kásiptik-tehnıkalyq mamandar daıarlanady. Nátıjesinde eńbek naryǵyna qajetti jas mamandardy daıarlaýda tek bilim uıymdary emes, jumys berýshi mekemelerdiń de jaýapkershiligi artady.